立場新聞 Stand News

土地大辯論已變得毫無意義

2018/7/3 — 21:35

林鄭月娥,圖片來源:rthk片段截圖

林鄭月娥,圖片來源:rthk片段截圖

上任一年嘅林鄭月娥,開始認為「土地大辯論」同答英文記者一樣咁「浪費時間」,所以依家借「市民唔等得」做藉口,反口要快過土供組公佈新填海計劃直接上馬。到目前為止,好多人都問點解咁心急,唔可以等多幾個月做埋場 show?

我嘅解釋係,佢應該做場諮詢之前,冇認真諗過佢哋自己想推嘅嘢,有咁多自己答唔到嘅 bugs,包括點解唔用土收一定要用公私合營,點解硬要將棕地「打折扣」,又點解可以咁神通廣大冇土地資訊底下知道地產商土儲係可行,但一堆堆棕土群有哂資料又話零碎唔可行。當然,佢亦都冇諗過民間短時間竟然有研究同論述能力,可以一個個擊破呢啲講法,政府同地產佬搵幾多個打手狙擊我哋都無法掩蓋。

此外,佢十月諗住粗暴硬推嘅填海計劃,選址大部分係配合國家大灣區戰略,上面規劃嘅土地好明顯係分俾啲國企、中港專才區、豪宅、神秘教育城、遊艇會、大型國家級科研機構,5 個已知填海區只係得一個有 6,000-7,000 個公屋居屋單位,土地大辯論過程令公眾開始漸漸為意到呢個事實,愈嚟愈對佢不利。我嘅估計係一開始出張「點心紙」頭嗰幾日,林鄭都已有跡象想繞過土供組高調干預民情,當刻已經知道民意其實不在佢一方。

廣告

所以明明係林鄭一開始自己話要花 18 個月尋找共識,依家就直情輸打贏要,又番番去長官意志繞過民意做事。真心去填過土供組個張「點心紙」,一心以為可以尋找共識嘅普通市民,真係情何以堪。

本身林鄭土地大辯論嘅如意算盤,係諗住「重施故技」,重覆做長遠房屋策略嘅諮詢模式,委任黃遠輝呢類人入去做白手套,可以擺平民間訴求去推動自己有哂前設嘅計劃,透過一份「民間報告」製造出她所想的「民意」,一直都以為自己呢招好灑家。在土地議題方面,就係要用這場可操縱的諮詢,打散棕土優先、善用閒置土地資源同講土地分配問題嘅民間議程,改為推佢自己最想搞嘅計劃,包括公私合營、填海同將郊野公園變成土地儲備,好可惜佢知道自己已經失敗咗。

廣告

無論有幾虛擬都好,原初土地大辯論係有種下放土地發展決策權嘅承諾,依家就係同你講我依家就係收番,你問我呢場土地大辯論依家重有冇實質意義,我會話已經冇,只係剩番土供組一群不願辭退嘅疆屍苟且偷安。連個特首都話民意係浪費時間,咁點解重值得市民重視?不如花多啲精力直接講番如何結束土地壟斷、真正對應問題嘅房屋策略,無謂再同佢浪費時間。

 

原刊於作者 Facebook

發表意見