立場新聞 Stand News

家教樂:阿婆唔好蝦我個仔!

2018/4/23 — 6:06

【文:許劭峪 (全民教育局 HKEd4All 特約文章)】

話說尋日買左盒Moana Lego俾個仔,阿仔愛不釋手,回程攬住盒野實一實。到屋企樓下,咁啱撞到隔籬屋老婆婆一齊搭lift。遇到認得嘅人,老人家就多野講,本屬正常,但佢望到盒上面茂宜個樣,就係咁話:「嘩乜個人咁肥嘅,好肥呀,你鍾意肥呀?唔~~真係好肥。」

阿仔維持一貫怕醜仔性格,不知所措,用個頭貼住我大髀,我彷彿感覺到佢小小嘅心靈受到了委屈,因為佢鍾意嘅卡通人物係度俾人踐踏緊,佢未必知道肥係唔好,但從婆婆嘅語氣知道佢係嫌緊茂宜。

廣告

呢程lift堅難捱,嗰一分鐘我個腦轉左十萬八千個圈:「肥肥肥肥肥,婆婆你仙風道骨都唔可以亂話人嫁,明明茂宜掹車邊都叫倒三角身型我好羨慕,再講肥得罪你咩?我老婆又好肉地又可愛喎,夠膽你下次搭lift見到佢講佢肥!」「我又無可能同唔通氣嘅阿婆烚氣嫁~但我又無理由睇住個仔唔開心唔幫佢」「我話翻個阿婆人地會唔會當我怪獸?」「個仔都要明白有時自己鍾意嘅野人地未必鍾意......」就係咁,最終我都係毒L一個,唔識駁人,最終我只係摸摸阿仔個頭,講聲「唔緊要」。但係,連我都唔知句野係講俾阿婆聽、自己聽、定個仔聽,我堅係唔知點處理先好。

件事說來有點窩囊,但我確切知道左,所謂美醜,對小朋友黎講真係無一定嘅標準,或者話,小朋友社會化過程中當然學會秩序規矩,另一方面亦會潛移默化一啲社會嘅價值觀、不論好壞,視乎大人點灌輸。當然,有啲喜惡,牽涉到本能反應,比如鍾意笑住對佢地嘅人多過惡屎能登嘅人,小朋友點都會有。阿仔鍾意茂宜嘅超能力,完全無在意過佢外表(話說茂宜嘅人物設計剛出時,確係有人話將普遍有肥胖問題嘅太平洋島國人以此肥壯的模樣塑造於世人前有醜化之嫌,但我總係覺得若然係翩翩公子或標準猛男咁,又會有人話係將西方價值強加落其他文化度,所以你話政治正確嘅野幾煩),而同阿仔玩得最埋嘅同學,亦都幾有肉地。我尋晚諗左成晚嘅,就係如何係普遍單一價值觀嘅香港環境中,讓我嘅仔女識得獨立思考。

廣告

所謂「養兒一百歲,長憂九十九」,呢個年代,憂嘅又點止温飽、健康、學業、前途呢啲。
 

發表意見