立場新聞 Stand News

《密探睥死羊》與動物傳心術

2017/7/13 — 17:16

The Men Who Stare at Goats 一幕

The Men Who Stare at Goats 一幕

【文:林勉一】

有線一次過踢爆五個自稱識動物傳心術嘅「動物傳心師」,方法的確係幾蠱惑 — 因為啲傳心師聲稱可以望住動物張相就傳到心,收幾百蚊幫人問米咁答問題。記者就搵張塑膠龜玩具嘅相俾五個傳心師試下,佢地對住玩具張相傳心,咁當然係成為笑話。

廣告

有個講法係傳心嘅嘢,你冇得用科學方法驗證。傳心好似問米咁,基本上係搵問米嘅人同個問米婆各取所需,佢唔講啲有得fact-check嘅嘢,唔好玩踢爆,問完米就心安理得。不過如果有人自稱識傳心收錢,咁其他人就有權試你,俾人試到你亂吹,係你道行未夠,唔好怪人裝你彈弓。

最騎呢係有條友仲搵啲似是而非嘅「量子物理」嚟支持自己嗰套嘢。Come on... 你傳心就傳心啦,本來傳心嘅嘢,如果你要用似是而非嘅(偽)科學術語包裝你嘅嘢,就唔好怪人同你用科學方法嚟檢驗你啲嘢係咪work。

廣告

有線訪問港大物理系周教授,佢諷刺呢個量子物理嘅講法,話如果真係work,佢地應該去咗國防部做嘢。講起國防部,我諗起《密探睥死羊》呢套戲,裡面講CIA研究念力殺動物嘅實驗,呢套戲係據稱由真事改篇。香港嘅動物傳心師冇幫CIA手,冇俾美帝利用,真係我天朝之福。

有人話呢啲睇相就傳到心嘅嘢,咪同啲宗教聲稱可以神通或者祈禱醫治差唔多(或者我用嘅問米例子)?咁就唔同。宗教性質嘅呢啲嘢唔會用(偽)科學包裝,佢地真係話你知佢地係宗教性質,宗教嘅嘢,佢地唔會講到實牙實齒一定work,因為成事在人謀事在天/要睇你造化/上帝早已預備/一命二運三風水,總之work定唔work都講得通。如果係預測或者算命,一定會講到公又中、字又中,唔會俾你咁易驗證到。

我冇話動物傳心術一定係搵笨,正如各大宗教同埋New Age嗰啲教導,你好難驗證,但求心安理得、精神得到安慰,咁就夠啦。講乜嘢量子物理CIA啫?其他收費做傳心嘅人多得呢佢唔少。

The Men Who Stare at Goats 宣傳照
林勉一
2017.7.11

The Men Who Stare at Goats 宣傳照

作者 facebook

發表意見