立場新聞 Stand News

從美國醫保 看香港苦況

2017/9/21 — 14:03

作者製圖

作者製圖

【文:中環行政人員 OOC】

筆者趁開學前,帶小朋友返美國探親(利申:筆者攞住外國護照,應該屬於政治唔關我事,沉默是金,最緊要唔好阻住我掘金嗰一班社會精英)。與多年冇見老朋友聚舊,講起先知佢父母頂唔順689攪到香港「立立亂」,上年終於行駛朋友幫佢哋攞咗好多年嘅綠卡,「的」起心肝移民。咁第一時間梗係關心問吓保險事宜,事關美國生活一定要有醫療保險,因為貴客自理,美帝唔會好似特區政府咁包你生老病死(質素就當然係另一回事啦)。朋友話好好彩,每個月嗰銀計劃(中間嗰隻)只係俾緊二百幾,兩老加埋美金五舊多少少一個月。

我話做乜平到冇朋友,因為我自己父母移民嗰時一個人已經俾緊六舊水保險,咁咪即係打咗嗰四折?朋友同我解釋,好在多得奧巴馬,自從有咗 Obamacare (Patient Protection and Affordable Care Act) ,啲保險平咗好多。佢而加最擔心係狂人特朗普上台後要對現競選承諾,廢除 Obamacare,咁佢就大鑊。我問點咁筍嘅嘢大家唔支持,佢話原來美國有好多美豬,唔多理解各項政策,舊年總統大選時特朗普大攪民粹主義,好多人覺得 Make America Great 啱聽好 buy ,所有政綱照單全收。佢話一旦奧巴馬醫保被廢除,好多特朗普嘅低收

廣告

入支持者(中西部嗰班)都會首當其衝受好大影響。

特朗普嘅共和黨有好多億萬富豪支持者,但亦有好多基層白人、低學歷、低收入捧佢。其實諗深一層,香港呢方面同美國極似。對上五年689、一眾權貴、薑蓉、私煙、愛字頭大攪民革式批鬥,將兩派市民放在對立面;689攪「稻草人」港獨尤其陰毒,同特朗普如出一切,因為你唔反對就係港獨、反中亂港(特朗普就會話你唔 patriotic 唔愛國)。如果你係新世界、湯家驊、林奮強呢類權貴,你支持一定有着數,黨絕對唔會虧待你。但一眾藍絲、維園阿伯同蛇齋餅糭公公婆婆就慘啦,因為好多政策其實對佢哋有百害而無一利。唔好講保衛「一國兩制」、法治同言論自由呢啲高層次嘢,因為佢哋一世都唔會明;剩係講貼身啲嘅全民退保、最高工時、強積金與遣散費對冲、男士侍產假、領展、廢除TSA、鉛水等.... (下省千字)。你估林鄭、蔣元秋、鼠王芬、廿蚊張會成功幫你爭取到(請參考立法會投票紀錄)?定係長毛、羅冠聰、姚松炎同劉小麗會企起市民一邊?

廣告

啲藍絲被人挑動民族情意結,個個中華英雄上身(你睇吓下面聲討留言就知),不理性亢奮。我相信這種鬥爭嘅路線會繼續落去。縱使林鄭競選時猛話自己唔係2.0,但觀乎佢近排對各大專院校民主牆,同蔡若蓮喪子被辱嘅處理手法,佢做唔到任何一個中環CEO會做嘅「大事化小 、小事化無」,而係延續689嘅「無事生事、小事化大、鬥死鬥臭、分裂社會」路線。各位有理性嘅香港人請自求多福;如果你好似我咁有外國護照,記住俾足心機努力掘金,揾夠好走。

思言財雋

發表意見