立場新聞 Stand News

從葉蔚琳與丈夫被解僱 看勞工法例對僱員保障有幾差

2018/3/6 — 19:55

經發起罷駛行動的九巴「月薪車長大聯盟」發起人葉蔚琳與丈夫劉卓恆,3月6日被九巴解僱。葉蔚琳與丈夫晚上步出九巴車廠,一併向傳媒回應事件。

經發起罷駛行動的九巴「月薪車長大聯盟」發起人葉蔚琳與丈夫劉卓恆,3月6日被九巴解僱。葉蔚琳與丈夫晚上步出九巴車廠,一併向傳媒回應事件。

葉蔚琳(及丈夫)被解僱,除了九巴仆街之外,必須趁機講講,勞工法例對僱員保障有幾差。

1. 嚴格講,法例保障「工會成員」,葉蔚琳發起的「大聯盟」不是工會,法例對她的保障已經比「工會」小。

廣告

2. 即使九巴擺明因為工業行動秋後算帳,而法例亦訂明,僱主無權以僱員參加罷工而即時解僱員工,但不能「即時」解僱,即係補返代通知金就可以了事,九巴而家就係咁做。

3. 葉蔚琳可以去法庭追討,但要錢要時間,你一定要用「個人」身份同「企業」打官司,一個打公仔用自己錢同企業打官司,點打?

廣告

4. 就算當葉蔚琳打官司贏咗,佢得到咩?公義當然係一部份,又或者要求復職同賠償,其實係贏返啖氣。九巴呢?就算輸咗又會點?梁乃鵬(九巴主席)會被人拉去坐監?傻啦,咪最多罰錢,如果無睇錯,無理解僱最多係罰款10萬。

一個打工既,無咗份工去告公司,輸咗官司傾家蕩產,贏咗公司最多罰款10萬,幾公平。

5. 其實法例都保障「工會活動」既(包括罷工等工業行動),咩活動先受保障呢?

法例話:

職工會會員可在適當時間參加職工會活動,適當時間指
- 工作時間以外時間
- 按照與僱主議定的安排或得到僱主的同意,僱員才可在工作時間內參加職工會活動

明唔明?

一係你喺工餘時間罷工,一係你要得到老闆批准先有得罷工,出色、超卓。

概括講,九巴仆街毫無爭議,要明白嘅係,咩制度先會縱容到企業咁肆無忌憚而唔怕有咩後果,罰錢當然小事,你一人一信又好、抗議又好,你有得唔坐九巴?九巴會無左個專營權?轉坐港鐵,港鐵又好得幾多?

如果咁,你都覺得無問題,又或者覺得你一開始唔好搞咁多野,正「白痴」(工聯會汽車交通運輸業總工會九巴分會副主任黎兆聰語),咁我唯有祝你勞資和諧,代代為奴,阿彌吉帝。

發表意見