立場新聞 Stand News

我,數學,攞二,入咗,港大

2017/10/15 — 16:34

資料圖片,政府圖片

資料圖片,政府圖片

【文:格物虎】

2018 DSE-ers:

覺得匪夷所思?Sorry, look no further. 真的。這是我自己的親身經歷。

我DSE數學攞Lv.2。我入到香港大學。

廣告

我估各位讀者應該唔會相信呢個係事實,又或者覺得係內容農場呃你哋報補習云云;不過如果我再講我來自乜嘢中學嘅時候,只恐怕大家會當咗科幻小說咁睇落去。

我係來自一間新市鎮 Band 3 嘅中文中學。家境一般,只係比上不足丶比下有餘嘅升斗家庭。由我中一入到呢間中學開始,我對我自己一直不抱任何希望,只係想有咁快得咁快畢業、考個車牌丶之後實踐我由細到大嘅志願 —— 揸巴士。

廣告

係中四嘅時候,昃Sir嚟咗我間學校教,而呢個老師改變咗我一生。

唔知係我行運定佢佢唔好彩,又或者千里馬終於遇到伯樂;昃Sir睇到我嘅長短,又好快瞭解到我嘅性格,鼓勵到我讀下書。碰巧自己英文一向喺間學校裏面表現比較突出,好快我就做到全級第二。冇錯,係第二。之於第一嗰位人兄,好學不倦丶視溫書為終身事業;而我就只係懶懶閒打機訓覺上堂傾計,好快就做咗佢嘅眼中釘。

昃Sir於是做咗一個決定:帶我同佢去港大嘅資訊日 (Information Day)。

嗰一次係我人生中第一次去港大呢間門高狗大嘅香港第一高等學府,嗰種雀躍得嚟又有少少自卑嘅感覺,實在沒齒難忘。行到去Lily Pond見到後面掛喺鈕魯詩樓外牆嘅海報,引孫中山一句"我尤如遊子歸家",心裏面別有一番感觸。不過,當時的我立下靜下來想,自己又唔係天之驕子數學又鐵定肥佬,又有什麼可能入港大呢?

呢一陣時,昃Sir忽然 Benny Tai 上身,使咗個Jupas版雷動計劃。oppositely, 係成功嘅。

昃Sir話有港大大部分科都係Best 5 去收生,只要科科合格,又有幾科表現標青啲,再interview 嗰時表現自己英文能力,再留意負責面試嘅教授有乜研究範疇,係面試嗰時講吓自己喺嗰方面嘅見解就好大機會入到。相反,佢叫攞第一嗰個同學唔好揀港大而揀中大,用盡佢potential DSE嘅成績 (中大當時以4C+2X 收生)。

果然,方法奏效。我DSE放榜嗰日,昃Sir係我隔離一齊見證歷史時刻 —— 幸運地六科合格數學攞二英文拎五星。佢叫我放心八月Jupas A1直入港大。

當然,Jupas 放榜之前,我自己間學校嘅升學組老師卻極力游說我放棄港大,話以前冇人入過港大,搏唔過,更話數學咁樣公大都唔會收,叫我發少啲夢。

最終,我喺薄扶林過咗一個寒暑,可能都係一個夢。

我,數學,攞二,入咗,港大。

唔怕DSE考得差,最怕JUPAS唔識揀。

2018 DSE-ers, XGU 見。

最愛您們的老虎
 

發表意見