立場新聞 Stand News

曹星如之殤

2017/10/9 — 19:09

曹星如,圖片來源:rex tso facebook

曹星如,圖片來源:rex tso facebook

其實曹星如真係好代表到,咩係香港精神。

香港精神核心,就係你唔得係你失敗,你得大家都有份。八連勝、廿二連勝,好勁呀、神奇小子呀、香港之光呀,其實拳擊連香港所謂精英運動項目都唔係。(講開,桌球都隨時無得做精英運動,傅家俊都係香港之光嚟架)

曹星如係勁,不過係靠自己、靠家人,鼓勵運動發展、支持運動員、鼓勵人追尋夢想,同香港呢個城市從來無關。呢個城市高舉嘅係「讀書、升職、搵錢、買樓」,如果佢唔係打出名堂,只係做到「香港冠軍」之類(例如曹父同曹哥,你識佢老鼠咩),就只會係「爛仔」、「打手」、「讀書唔成」。

廣告

極端啲講,佢只係咁岩係香港出世,佢嘅成功同呢個地方幾乎無關。其實咁都唔緊要,不過核突在佢成功咗,自然有一大票人衝出嚟,將佢升格做「香港精神」,其實,關你鬼事咩。

香港精神其二,贏就係一切、輸就係無謂。

廣告

任何運動都有贏有輸,從來都無不敗拳王呢回事,結果佢打咗一場「結果有爭議」嘅比賽,就俾人柴到上太空,贏得唔光彩、輸唔起,甚至「做假」、「河蟹」、「好似大陸咁」。

喂阿哥,而家到底係曹星如輸唔起,定係你將自己覺得人地一定要贏唔輸得嘅諗法,強加係佢上先?你憑咩肯定人地輸唔起,要夾埋裁判打假拳?因為你自己覺得佢一定要贏嘛。

講開,其實呢個「爭議結果」,都充分發揮香港精神,屌咗先算。

拳例唔識唔緊要,無睇開拳擊有幾咁出奇,問下先望下先得唔得?梗係唔得啦。

曹星如隻眼腫到唔可以繼續打,而眼腫係意外俾對手個頭撞到,唔係俾人打成咁,裁判決定終止比賽計點數,結果贏咗。假咩呢?屌咩呢? 

都算,一開始屌錯咗,時隔幾日有咩要解釋要講,無限咁多人講解曬,仲死撐咩呢?

你話,明明人地形勢佔優,邊有理由咁判,其實呢計點數係計打「中」唔係計打「咗」,如果打得多就贏,利物浦應該場場都贏波;你話贏得唔光彩,係架,佢有隻眼幾乎睇唔到嘢,再打落去可能會輸架,咁你又想佢點呢,認輸唔好打?到時又會俾人屌佢無堅持到底,定係你想佢出嚟公開道歉話自己「贏得唔光彩」?又有人話係主場雞,係都唔出奇呀,有咩運動無主場之利嘅呢又。

講到尾,作為一個運動員,佢不過係隻眼腫到痴線都繼續打,最後裁判腰斬賽事,計分贏咗,佢做錯啲咩?

不過唔緊要,香港精神,就係我覺得唔滿意唔順眼,就係你唔岩,係咪?

發表意見