立場新聞 Stand News

最叻的女人不去爭

2017/3/5 — 10:19

劉鑾雄, 甘比, 劉鳴煒(蘋果動新聞片段截圖)

劉鑾雄, 甘比, 劉鳴煒(蘋果動新聞片段截圖)

超級富豪劉鑾雄分身家,甘比分到嘅,較大劉首任妻子所生嘅大仔劉鳴煒還要多,傳媒係咁易估計,甘比身家超過500億,由當年一個屋邨妹,到今日女首富,傳奇到可以拍電影。

大劉有財有勢,曾經喺佢身邊嘅女人多不勝數,論名氣,高過甘比嘅大有女在,論姿色,甘比更加難跟啲選美冠軍或大明星相比,講到學識,甘比只係中學畢業,遠遠比唔上啲擁有法律專業或博士學位嘅紅顏知己。

英雄救美

廣告

咁點解最終會係甘比得到最多?簡單講係甘比「唔去爭」。甘比係藉周星馳介紹而做咗大劉助理,當年大劉有兩個女助理跟出跟入,飲茶食飯,一個主要幫大劉處理啲公務,而甘比做啲較細微工作,例如大劉去福臨門食飯或見朋友時,一直坐喺大劉旁邊唔出聲,靜靜聆聽,適當時候為大劉分菜夾餸,到大劉朋友走時,佢又會親自送客,予人感覺係禮貎周周,與世無爭,十足一個乖乖的鄰家小女孩。

其實好多男人心中,都唔鍾意旁邊有個好似英國首相文翠珊、或者係德國總理默克爾、甚至係香港林鄭咁嘅女人,當然我唔係指個樣,幾乎所有男士都愛美女;主要想講係不少男性對於事事要爭勝,樣樣以事業為先嘅女強人,骨子裡並唔係好喜歡;特別啲好叻嘅男人,佢哋唔需要一個女王,反之喜歡照顧弱者,情況一如當年李澤楷幫梁洛詩贖身,小小超就好像一位英雄,將弱質纖纖嘅美女從厄困裡拯救出來。

廣告

最後勝利

還有,許多男性雖然很花心,但對於一個毫無怨言,温純而默默守候身邊嘅女性,他還是看在心裡,當過了一段相當時間,男性玩又玩夠,甚麼也見過時,佢會覺得虧欠了這個女人,於是會俾更多更多嘅嘢去補償。你看看,成龍跟咁多女人喺過一起,最終還是立遺囑將所有財產俾林鳳嬌,就因為覺得這女人為自己真啲犠牲最多。

甘比嘅故事教我想起日本戰國時代,由織田信長、豐臣秀吉到德川家康,後人咁樣評價呢幾位日本梟雄:「如果樹上有一隻雀仔,織田信長會馬上打佢落嚟,豐臣秀吉就會慢慢氹佢落嚟,至於德川家康,就會一直等,等到佢飛落嚟」,結果能真正統一天下嘅,竟然係德川家康,並開德川幕府二百多年的時代。

發表意見