立場新聞 Stand News

會笑人係虎媽嘅多不勝數,但佢哋自己都係一X樣

2017/10/13 — 13:10

網絡圖片

網絡圖片

喺香港,其實有冇人真係會自認係虎爸虎媽嘅呢?我認識嘅家長之中,會笑人/鬧人係虎媽嘅多不勝數,但荒謬嘅係,喺別人眼中,佢哋自己,其實都係一X樣。有啲朋友冇仔女,見到啲有細路嘅,一樣會笑佢地緊張,鬧佢地逼得啲細路太緊要,但係過咗幾年,到佢地成為咗父母之後呢…

「X! 嗰陣又鬧我係虎爸又話我剝奪啲細路嘅童年,幾咁正義呀。你睇佢依家?仲衰過我呀!」

我同講呢句說話嘅朋友講:「唉。邊有人會自認係虎爸虎媽架呢老實講。就算今日佢逼到個仔PK都好,佢都係覺得隔離個陳太虎媽過自己多多聲架啦。個個父母都話支持快樂童年,個個都喜歡 happy school 架啦,有人會唔係咁講架咩?」

廣告

當然,講係咁講,但做又往往唔係咁做。至少,在旁人嘅眼中,香港父母個個都望子成龍咁款。

年幾前有個朋友移咗民去澳洲。移民之前,我一直認為佢係個超級虎媽嚟嘅。搵學校要搵名校,個女入到名校又見佢要逼個女讀書讀到趴街,仲要補習呢樣補習嗰樣。當然虎媽又唔會認自己係虎媽啦,當朋友用「虎媽」嚟笑佢嗰陣,佢堅係唔鍾意的。去咗澳洲一年,佢個女開心晒。佢話阿媽完全冇逼佢讀書啦,仲成日叫佢去玩多啲。朋友即刻話:「嗱,我早就話自己唔係虎媽架啦!」

廣告

好多人都以為,父母逼個細路係出於虛榮心,要用個細路嘅成功為自己臉上貼金。但實情係,大家係集體淆底,多過想借個細路嚟攞威。你話淆底係唔理性嘅表現,我都認同的。但係這種風氣係日積月累咁留傳落嚟。除咗家長淆底,怕子女讀唔成書跟唔上,學校其實都淆底,怕唔教深啲唔逼得勁啲校譽會慢慢保唔住,集體淆底變成結構性問題,最後學校辛苦,家長辛苦,學生又辛苦。成個產業都一塌糊塗。

華人社會迷信讀書可以脫貧可以致富。以前或者係,但今日我自己都唔信了。但唔信還唔信,你還是唔夠吉士同個仔大大聲講:「讀書其實冇乜用架…」。政治不政確嘛,而且係咪完全冇用呢?又唔能夠咁講,只係讀書嘅「威力」明顯冇以前咁大遮。

香港社會,有錢同冇錢係兩個世界。唔係個個都貪慕虛榮,要求自己活在天堂嘅人其實唔多,但絕大部份人都唔想在地獄生活。有些基本生活需求,做父母嘅總希望能為子女爭取得到的。有錢嗰批會想辦法為子女置業,冇咁有錢嗰批,至少希望為子女練得一身好武功,讓佢將來有能力為賺到自己嘅基本生活。只係呢一身所謂好武功,當人人都響度喪練喪操嘅時候,個個都so call變成武林高手嗰陣,其實練得再勁到最後都會變成嘥鬼氣的。

但係如果唔去練功,仲可以做啲咩呢?呢個可能大概係今日做父母嘅最值得去諗諗的。

我問移民澳洲嗰位朋友,到底係乜改變到佢唔再逼個女呢?

「我以前喺香港逼,因為佢身處嘅環境,如果做大落後嗰個,會俾人踩到落去變成地底泥一樣。佢喺外面俾人踩死,唔係話返屋企阿媽錫返就冇事的。我唔想佢一路俾人踩住長大,所以我唯有不斷鞭策佢囉。」朋友說:「去到澳洲,都冇人會喺呢方面去嘗試踩死佢啦,佢讀書讀得好,又或者讀得唔好,佢都可以健康成長的,咁,我仲要逼佢做乜?」

「唉,如果佢決定喺嗰邊落地生根嘅話,就算讀唔成書,生活都都唔會真係好差的,仲有好仲路行,所以,冇所謂啦。我都話,我其實唔係虎媽啦。」

聽完,總覺得有少少歪理feel,但又好似啱啱地喎。

都係嗰句,香港地,邊有人會自認係虎爸虎媽架。

祝大家有個愉快嘅週末。

作者 Facebook

 

發表意見