立場新聞 Stand News

林作搵到個「被屈性侵」嘅KOL藍海

2017/12/4 — 15:55

林作,圖片來源:遵理學校片段截圖

林作,圖片來源:遵理學校片段截圖

今日林作出咗篇文,質疑呂麗瑤出POST動機。

第一天睇呂公開呢件事,我以為佢跟住係會報警嘅,但到呢一刻都未。如果佢真係唔報警,或者警方主動調查佢都唔協助,其實件事會好難搞,甚至倒轉過來發展。

不過,對件事質疑還質疑,質疑都要有理據架喎,尤其對一個「可能的」性侵受害人。你話Y教練好慘,但如果係真,畀你哋亂咁質法,呂都慘架喎!

廣告

講返林作篇嘢先,我就才疏學淺,有啲唔係好明,膽敢請教FB大神(以下有序數的都是引用林作原文)。

3. 篇稿, 的確好多人睇到好感動好身同感受, 但其實睇到嘅係一段充滿舖排, 挑起你對弱者保護情緒嘅文章。

廣告

然後佢最後話:

一句講晒, 佢篇野成篇係雕琢而成嘅商業文案, 你幾時有泡眼淚蘊藏住, 幾時要你滴都計到呀。

<- - 呢個我就好難明白。人哋寫得好,有組織,可能寫咗三星期,真係雕琢出嚟,目的係要勾起公眾對事件的關注,咁當然係「充滿鋪排」和「挑起你對弱者保護」的情緒啦,咁又點呢?唔通寫出來,毫無鋪排,九唔搭八,希望挑起你對弱者的仇恨?陶傑同林作兩位寫篇相反立場的文章,唔通唔係希望挑起讀者對呢種手法嘅反思同質疑,而係希望挑起讀者更愛護呢位弱者嗎?唔通我寫篇文質疑你,要令讀者覺得我支持你咩大佬。

寫得好,你話佢鋪排係文案,寫得唔好,你話「連交代件事嘅能力都冇,成十年前,點信你呀?搵我補吓習先啦傻妹」。

4. 話我現實啦, 得到支持後, 真係做乜都得。出書啦講talk啦做顧問啦, 繼續做運動員培養新人, 開個免受性侵page基本, 呢個世界只需要集網民之氣就做明星架喇

<-- 呢個我哋梗係知你最清楚啦。不過咁喎,第一,「繼續做運動員培養新人」,以佢嘅成績,一向都可以啦,點解要借性侵上位?第二,用性侵經驗嚟做KOL,我覺得真係你先諗得出咁絕嘅橋,我暫時都諗唔到坊間有邊個自詡「被性侵過」來做key opinion。恭喜你呀,你真係搵到個藍海呀,開個免受性侵PAGE,好橋,只不過我唔知咩商業品牌會搵佢落廣告,唔通遵理?哈哈,搵呂宣傳遵理上市囉。

1. 三個星期前講俾學校知, 然後學校辭退Y教練。本身已可進入法律程序, 何止學校內部查呢?

2.講左, 然後呢? 蘊釀三星期, 對網民告解? 你信網民多過你自己以致警方甚至法律?

5. 個男人呢? 其實佢未定罪喎, 案件甚至連司法程序都未進入, 已經俾石頭掟死啦, 駛乜判? 定真係覺得網民定生死就可以? 無辜嘅就俾你哋屈一世變態架喇喎。當年我跟師見過師傅清洪為一被控性侵犯教師辯護,到今日我都相信被告係清白,佢卻被判入獄,呢世難翻身。

<- - 咁我又唔明,其實林作搵到個藍海,使乜擔心呢個教練呢?網絡最好嘅,就係大家都可以「搵食」,只要佢覺得被屈,清楚自己係清白,呂唔報警,佢都可以主動企出嚟,搵陶傑、林作及一眾支持佢嘅網民撐,星光熠熠做佈景版,等教練拿住個「me, fooled」牌,講述被屈被整蠱經過,喂,人氣喎,以後大把水喎。

其實諗深啲,如果呂告上法庭,根據過往網民對風化案嘅經驗,教練實輸晒,未判個個都會認定佢有罪。但相反,只要呂唔報警,教練係贏晒架喎。呂可能真係以為網民可信過佢自己以致警方甚至法律,所以依家已經好多網民勁插呂,幾難聽都有,又畀人貼舊圖指控,原告變被告,提出問題的人變成要被解決嘅人。好明顯,依家教練個勢好強,到時你唔使搵清洪,教練都已經一世清白架喎,佢企出嚟,加上陶傑林作兩大才子加𠕤,呂的形象進一步插水,教練成為所有捲入性罪行男士的神明,成為援引被屈的最佳例子。

話我現實啦,得到支持後,真係做乜都得,出書啦講talk啦做顧問啦,繼續做教練培養新人,開個免被屈性侵page基本,呢個世界只需要集網民之氣就做明星架喇。到時呂又開PAGE,教練又開PAGE,你估邊個多人氣?梗係教練啦。點解唔做先?

諗諗吓,林作真係奇才,咁嘅藍海都畀你搵到。我喺度強烈呼籲嗰個教練,冇做到唔使驚,企出嚟,告呂麗瑤,告培正,告埋林鄭誹謗,大把人支持你。不過到時林作你唔好縮沙話唔支持呀吓,唔好話補習社唔畀你支持呀吓。

6. 個女呢? 我當然相信佢唔會貿然講大話, 都冇謂, 10幾年前可以仲有咩証據? 假如當年佢仲係無知同驚到咁。

7.世界係唔公平嘅, 如果佢冇咁嘅運動成績, 又冇美國嗰個更出眾嘅行出嚟講句由victim 變survivor, 你估佢出唔出嚟呀嗱?

林作真係幾難觸摸,首先講個女仔鋪排成件事係要做「性侵KOL」,無端端睇到尾又話「唔會貿然講大話」,咁即係點樣啫。跟住話世界係唔公平。狗唔知咩,你係個頭像都冇嘅網民,你寫篇咁嘅嘢我都唔會浪費時間理你啦。呂寂寂無名嘅話講出嚟,你又話佢喺體育界撈唔掂要靠炒作性侵犯上位搵嘢撈,然後做乜都得。咁美國行出嚟嗰個,就係想多啲人企出嚟,唔通你唔知「me too」點解咩?咁依家有個人真係行出嚟,你又話「嗱嗱嗱,人哋唔係行出嚟想更多人行出嚟,你都唔行嚟啦」,點樣呀大佬!

8.香港而家最興一窩蜂人云亦云架啦, 擺明搵位泊, 泊呢個穩陣嘛。23歲女前途光明, 體育成績優秀, 未報警都全世界企佢嗰邊啦。

「未報警都全世界企佢嗰邊啦」,你呢幾日有冇上網架?係有人企喺佢個邊,但亦都有好多人包括你唔係企佢嗰邊架喎,狂插佢架喎,好清醒架喎。

最後,林作係咁作結嘅:

如事件屬實當然係不幸, 而犯案者固然要處罰。but now, i cannot see this case is coming even close to this.

<-- 咁呢個都算係重大發現嘅,因為警方都未立案,所以now I can see this case is never close to this添啦。

不過最後要讚一讚,林作呢篇嘢真係好真心,成篇都唔係雕琢,冇鋪排,更加一點都唔似商業文案,只像一個冇頭像嘅留言者,我欣賞佢呢份真心。

 

作者 facebook

發表意見