立場新聞 Stand News

林鄭首置樓大陷阱

2017/9/5 — 11:30

林鄭月娥(資料圖片)

林鄭月娥(資料圖片)

有傳林鄭月娥即將提出「首置上車盤」計劃,參考公屋建築成本和首置人士入息定價,說要推動「置業」,好似好吸引。但你以為你無樓就有得「首置」,少年你太年輕了。

林鄭眼中的「首置人士」,其實大部分只限現時住公屋和合乎公屋上樓資格既低下層。佢諗緊既係月入2萬元的公屋家庭,拎佢地一半既收入去首置供樓,以1萬元供樓十幾二十年。原先無能力置業公屋戶吸上車,其實會面對重重風險,有機會出現家庭負債,又或因失業供不起樓被收樓;又要面對大廈老化時各種維修及被圍標的額外開支。

從政府的角度,拎塊地唔起公屋起「首置樓」,將住公屋戶推佢去買「首置單位」,其實好可能係為左自己財政上資金回籠,吸走啲公屋居民一直儲落既餘錢或者借貸,咁就唔駛再承擔租住公屋既維修同財政責任,其實佢係諗緊縮數,多過解決你既房屋問題。

廣告

從土地供應而言,呢啲「首置樓」分分鐘食左本身可以用黎做租住公屋既土地發展,以前租就有得住,未來可能有得住就要供20年樓,調轉頭令整體市民獲得房屋資源既門檻仲高左添。

林鄭剛上任時,更曾經講過話希望用「公私合營」既方法去推行「首置房屋」,引入地產商玩埋一份。具體即係點玩? 好可能係以提供地價優惠、規劃放寬,或者係私人參建,俾地產商邊起「首置」邊起豪宅。政府又話會盡力解決房屋問題,好心就咪好地地自己起幢首置樓出黎,怪就怪在點解一定要分俾地產商起益佢先得?

廣告

其實一早居屋售價定左係樓價七成已經脫離左市民負擔好耐,其實點解唔係成個居屋政策變哂只計建築成本既可負擔房屋,而係額外無端端又整多種「首置樓」? 可能要等未來林鄭公佈細節先知佢諗緊乜啦。

原刊於本土研究社facebook

發表意見