立場新聞 Stand News

毛記上市文件閱讀包膠:腦細呢一年賺咗幾多錢?

2017/7/28 — 17:34

林日曦

林日曦

擒日媒體界最大嘅新聞,一定係毛記母公司毛記葵涌上市。睇返佢份初步上市文件,其實有好多新發現:

一、林夕做獨立非執董 — 早前林夕喺黎明越南咖啡廣告客串做「喂夕經理」一角,原來今年6月起,佢仲升職做埋毛記嘅「喂夕董事」,董事袍金每年係15萬。

二、毛記準備染指唱片業 — 原來早喺去年,毛記已經成立咗「毛記唱片有限公司」(後改名為Number Eighteen,文件話呢間公司未正式運作),唔知係咪準備為盤菜瑩子同黃慘盈出碟?

廣告

三、毛記另開廣告公司 — 根據上市文件,毛記成立咗一間「French Rotational Production Limited」,提供「廣告及宣傳服務」。本版估計,French Rotational應該係以一般廣告Agency作為競爭對手, Expedia 同DBS Eminent Card 同 DBS Loan今年嘅廣告,可能就係以呢個牌頭去接嘅。

四、游學修曾經埋毛記堆? — 根據上市文件,黑紙曾經同第三方合資,開設「十九號有限公司」,提供創意多媒體製作服務;而據《壹週刊》年多前嘅訪問(http://bit.ly/1ZRZal9 ),第三方原來就係游學修。不過呢次合作只係維持咗4個零月,黑紙就買返晒所有股份。游學修一向同Cap TV關係密切,竟然曾經同毛記行得咁Close,都幾出人意表。

廣告

五、毛記台慶商業上極成功 — 去年毛記搞嘅「十大勁曲金曲分獎典禮」同「萬千呃Like 賀台慶」,分別為毛記帶嚟340萬元同1050萬元收入;除咗靠賣飛同品牌贊助之外,毛記授權Viu TV播放台慶,原來都有得分Viu TV嘅廣告收入!

六、毛記下年重啟大型Event — 既然搵到錢,當然唔會畀佢停,根據上市文件,毛記喺下年同下下年,準備每年策劃兩次大型活動;而據腦細過去嘅言論(http://bit.ly/2uCXkyU ),佢係寧願諗啲新嘢搞嘅人,到底最後搞乜,真係要拭目以待。

七、毛記冇縛住旗下偽員 — 根據上市文件,毛記嘅總經理人有限公司,現時旗下有16位偽員;好多娛樂公司都會同藝人簽10年約,但毛記同偽員只係簽三年或五年約,大部份都會喺2020同2021年滿約。不過部份偽員,好似羅若Off、55555家謙,佢哋嘅facebook page 早已呈荒廢狀態。若果毛記想搞多啲大型活動,睇嚟真係要搞「偽員訓練班」,填補多啲演偽人材嘞。

八、腦細一年收入有幾多? — 根據上市文件,林日曦至少有呢幾項收入:

1. 薪金:16-17年度,腦細嘅薪金係129萬元

2. 版稅:16-17年度,腦細喺賣書方面嘅版稅有25萬8千元

3. 股息:16-17年度,毛記一共派息3500萬元,腦細佔3成股份,即係收咗1050萬元股息!

單計以上三項,佢喺16-17年度嘅收入至少已達1204萬8千元,而當中並未包括佢獲邀參與六次廣告所賺嘅演出費!而今次申請上市,毛記亦會派發特別股息2200萬元,即係腦細會再收660萬元!

正所謂「十年河東,十年河西」,過去廿年黎胖子穩坐傳媒大亨位置,嚟緊喺傳媒界叱咤風雲嘅,應該係瀟湘型才子嘞。

 

(以上數字根據毛記葵涌上市初步文件公開資料計算;支持本文作者,請Like 廣告狂人 facebook page)

發表意見