立場新聞 Stand News

繼承者們

2018/2/28 — 11:39

內容有講述家財萬貫的「繼承者」生活形態的韓劇《繼承者們》宣傳照。

內容有講述家財萬貫的「繼承者」生活形態的韓劇《繼承者們》宣傳照。

【文:地產界小薯】

近年唔少發展商啲創辦人,或者在任人年紀有番咁上下,都會安排佢地啲第二代第三代接棒。接棒前,佢地又唔可以一黎就上神檯,點都要係公司做下野,浸淫下,由低做起。所謂嘅由低做起,可能講緊一兩年,之後就會搖身一變,變經理、變董事、變老細。仲有唔係繼任人嘅王親國戚,王子公主,佢地混在其中,都好似漆黑中嘅螢火蟲,咁鮮明,咁出眾,唔會有人夠膽得罪嘅。

最慘係你被assign做呢啲人上司,鬧又唔得,俾多野佢做一陣話你虐待佢。你唔俾野佢做,佢可能又唔高興。佢好想有一番作為攪攪震,你又要執佢手尾。你讚佢做得好,大家又覺得你係擦鞋。不過你始終係佢上司,依家佢仲會俾番幾分薄面你,但遲啲一個唔該,一年半載後,佢可以係高你幾個grade嘅上司,甚至係大老闆。換轉頭,你睇住之前又naive又simple嘅佢毫不留情指住你黎鬧,感覺當然不是味兒啦!

廣告

有啲公主王子有時仲會有老闆老闆娘黎探班,同埋惹來好多狂蜂浪蝶。公司唔少人想飛上枝頭,都會借頭借路親近,不過呢啲通常唔work。公司以外都有大把人顯殷勤。某小姐就有追求者成個禮拜一日一紮花,搞到成個花園咁,不過好可惜,小姐唔領情,叫人處理掉。

其實好多時佢地都唔係壞人,只係礙於身份,令身邊啲同事無所適從。有啲專登保持距離費事俾人有話柄,有啲就埋身巴結揾著數。就算你無機心純粹同佢做下friend都會俾人背後話你,又或者兜口兜面警告你要保持距離。佢地自己都可能好無奈。或者,高處不勝寒。

廣告


作者個人簡介:如筆名,我係地產界嘅Small Potato,喺發展商打滾左一段時間,對呢個行業有一定認識,行內結識唔少朋友,聽咗好多八卦嘢。我專寫行內gossip同分享行內知識同經驗,令更多人對呢行有更深嘅了解。

Blog: https://www.facebook.com/propertysmallpotato/

 

發表意見