立場新聞 Stand News

辦公室欺凌

2017/3/7 — 18:23

資料圖片,圖片來源:《horrible boss》劇照

資料圖片,圖片來源:《horrible boss》劇照

上星期,收到網友留言(見下圖),問我係咪曾經遇過辦公室欺凌?吓!嚇死我,辦公室欺騙畀人呃,我就聽過見過嚐過,但二十一世紀嘅香港,自由多元,畀人蝦,畀人欺凌欺壓,完全無咁嘅經驗,所以諗咗一晚至識答。

香港地,受人二分四,跪地餼豬乸,大部人選擇啞忍,自我麻醉息事寧人,當自己時運低,好衰唔衰碰到汚糟嘢;可惜避得一時,唔避得一世,畀人見到你既驚且怕,仲唔得寸進尺,可以斷言,噩夢至啱啱開始。

諗諗吓,細聲疾呼,大聲求救,總之用盡方法,用最誠實嘅方法,唔需要加鹽加醋,嘗試練大個膽,私下表達,或者公開講,一次唔得,做多十次,等人人都知你嘅苦況,然後諗定後路,大不了唔撈,一拍兩散。

廣告

計我話,世界咁大,唔值得為咗一個淺薄嘅小人,一群勢利嘅官僚,一間唔尊重人嘅機構,虛度寶貴光陰,至於「人求事」定「事求人」,唔試過又點會知,關鍵係一技傍身同埋以誠待人,取決於心態眼界境界。

至於痛唔痛快?自求多福?據理力爭?抑或憤而劈炮?歸根結底,只要懷抱勇氣,引刀成一快,決心走出舒適地帶,其實唔係好難,做得多就會習慣。不過,網友讚我俗世清流,如果加句正人君子,當然更加痛快。

廣告

虛銜虛榮虛名,古往今來,幾乎無人可以走得甩,只要適可而止,恰如其份,發揮上天畀每一個人嘅天賦,心懷感激,就很不錯了。草蜢仔,你究竟明唔明白?

 

 

原刊於作者 facebook

發表意見