立場新聞 Stand News

陶傑再諷「MeToo」性侵表態 稱單方面貼Selfie就可令其他人變加害者

2017/12/1 — 14:48

背景圖片來源:陶傑 facebook

背景圖片來源:陶傑 facebook

港隊田徑女將呂麗瑤公開童年時被性侵經歷,令社會關注性侵情況,紛紛呼籲受害人勇敢挺身舉報。不過,本港知名作家、商台主持人陶傑對「#metoo」表達不同看法。繼早前在商台節目中發表「食雞蛋只需關心雞蛋好食,不會理母雞在農場被多少隻公雞佔便宜」言論、嘲諷荷里活「#metoo」表態風潮後,今日再在自己社交網站專頁發帖,稱在幼稚園低班時曾被女教師摸面,現在回想也是「性侵犯性欺凌之低端人口之一」,明顯帶嘲諷意味。陶傑又稱「感謝Facebook 新世代,只須單方面貼張Selfie,就可以令好多人變成『維恩斯坦』,或者Kevin Spacey」。

陶傑在FB專頁發表題為〈兄弟姊妹站出來〉的文章,並附上自己也拿著 #metoo 的相片:

見到荷李活女明星個個玩得咁型,崇洋的我,又豈能不追上西方先進國家潮流呢?

我在幼稚園低班時,曾經俾一個女教師摸過塊面,我現在回想,雖年代久遠,我也無辜一度淪為性侵犯性欺凌之低端人口之一。

那個Miss 叫做黃詠儀(好普通的港女名,如有雷同實屬巧合),佢當年未經我同意,運用職業霸權,觸碰兒童的我的身體。

黃詠儀婆婆你而家去咗邊?

感謝Facebook 新世代,只須單方面貼張Selfie,就可以令好多人變成「維恩斯坦」,或者Kevin Spacey。

荷李活處處色魔,香港體育界又咁淫賤,咁學界有冇教獸?宗教界有冇牧屍?

香港影視娛樂圏,唔通又只係一個人人追求戲劇藝術進修的清淨天堂?

(PS: 2015年3月,特首千金梁齊昕在Facebook 貼圖透露曾被老母家暴,有人報警,同年3月21日,警務處處長曾偉雄話:「不能夠網上講乜,警方就去查。」)

廣告

「在荷里活發生呢啲嘢,係唔嚴重嘅」

陶傑早前已批評由美國荷里活演藝界掀起的「#metoo」表態風潮,在商台節目《光明頂》中評論荷里活影星紛公開曾被性侵事件時,他說:

廣告

「身為觀眾,我地對於呢啲幕後爭風吃醋,製片人、電影老闆 hi 油佔便宜呢啲,就同電影觀眾冇關。我地呢,就係等於食雞蛋,隻蛋好食,同烚個雞蛋好味、啲蛋白靚嘅話,我就唔會理你生雞蛋嗰隻雞乸,喺個農場嗰度呢,係俾幾多隻公雞係佔過便宜。」

陶傑指,荷里活是特殊工業,而非學校或辦公室。「如果係一個辦公室,一個經理,或者一間小學的校長,係對一個女教師,一個MISS作出呢啲行為,話如果唔就範就唔升佢做主任諸如此類,呢個係嚴重。但我覺得在荷里活呢啲工業,發生呢啲嘢,我認為係唔嚴重嘅。」

陶傑又指,「喺荷里活,投身呢個行業,尤其是女明星,你個美貌係currency,係一個貨幣嚟。這貨幣只有女明星,或者想投身女明星的人所擁有。」

陶條又反問另一名主持,「一個美貌少女,唔需要哈佛耶魯大學學位,甚至唔需要有好高的教育水準,只要俾星探發掘,如果呢個星探肯捧佢,肯呀,中間發生咩事我地唔知先,佢會有朝一日,好大可能賺取的報酬。呢個報酬包括佢個名聲、財富,影響力,影響力都係架,係權力嚟,係同佢本身的實力,學歷係不相稱的。你承唔承認?」

發表意見