立場新聞 Stand News

DSE 放榜寫幾句

2018/7/11 — 9:59

資料圖片,政府圖片

資料圖片,政府圖片

我好少會講呢啲佛計教仔,不過每逢呢啲日子太多牛鬼蛇神妖言惑眾。

各位DSE考生,萬一你聽日(編按:7月11日)考得唔好,我淨係想你做兩件事:

1. 邊個同你講「唔緊要」、「盡咗力就無悔」,你一定要屌柒返佢。

廣告

幾時都可以講呢幾句話,惟獨放榜後唔講得!「唔緊要」?我屌你,「唔緊要」咁考DSE嚟把撚?使春讀幾年去考呢個試?你唔喺考試前講?你考試前講我連試都唔去考慳返啲時間玩呀。DSE唔重要,咁係咪讀大學都唔重要?

作為大學入場券,DSE嘅成績「好緊要」!尤其你係普通背景,無錢出國留學、無幾層樓喺手,DSE考得好最後對你人生好大幫助。

廣告

千祈唔好理嗰啲乜嘢1分做大廚、博士執垃圾嘅故事,100000人中梗有呢啲故事。作為大學drop out(中途退學嘅人),Steve Jobs係喺車房建立Apple-但有幾多大學drop out鬱鬱而終?有冇人講你知?呢啲報導,勵志可以,參考不必。

老師呀、長輩呀,講呢啲嘢係希望你唔好失落。你唔失落,唔講個事實畀你知,你唔會知DSE有幾重要。對我嚟講,當年A-Level 考得好,最後一個學位救咗我全家。

呢啲乜嘢「唔緊要」、「盡咗力就無悔」,完全係糖衣毒藥,因為DSE嘅成績「好緊要」!

2. 「重讀」係首要考慮嘅選擇。

因為DSE係好重要,萬一你考唔好,你第一個要考慮嘅係「重讀」。

係,重讀好辛苦,但你老味,你重讀有乜嘢優勢呀?就係你有多大部份考生考DSE嘅經驗!即係,你扑過一次嘢、溝過一次女,有經驗肯定會叻過啲青頭怕醜仔。而家有個天然優勢,咁都唔好好利用?

千祈唔好因為成績唔好、覺得要花一年時間/金錢,就走去所謂升學,讀埋副學士、高級文憑等等。仆街!啲嘢呃鳩你時間同金錢嫁!凡事總有例外,不過如果同樣要搏,係咪搏個有20%嘅機會(DSE入大學比率)?讀完副學士,成績最好嗰小貓三四隻先升到大學,又係要比原先讀多一年,挑!咁不如直接重讀?

除非你早喺考DSE之前已經心儀IVE嘅術科同工科,一年時間同金錢,喺你已經有嘅經驗優勢上,重讀一次,畀多個機會自己,係首要考慮嘅選擇。

呢個制度無畀機會你哋:你哋DSE失敗,就搵啲嘢塞住你把口,完全無問過你究竟想點、要唔要,總之你成績唔好呀,直接建議你去IVE/副學士,務求唔畀空間同時間你思考同考慮。你以為吸毒會令生命無Take 2?其實你讀書,師長以至整個教育制度都無畀Take 2你哋。嗰啲Take 2,呃人嘅。

你要拒絕接受呢種虛偽:你嘅命運只能由你自己掌握。

萬一你考得唔好,請認真考慮重讀。

一年,換你一生。

__________

(話某啲升學渠道呃人,又唔知要得罪幾多人。睇開啲啦。)


(原刊作者facebook專頁

發表意見