立場新聞 Stand News

JUPAS揀科攻略

2017/10/18 — 10:57

【文:昃sir @全民教育局 HKEd4All】

又到咗中六學生要揀大學嘅時候,昃sir多年來有幫自己、朋友同埋學生排JUPAS嘅經驗,響度同大家分享吓。

1. 縮窄範圍、辨清誤區

廣告

揀大學課程,最怕係眼花瞭亂。點解會搞成咁,好多時就係因為學生連自己鐘意啲咩同適合啲咩都唔清楚,就會好容易搞到自己揀極都唔夾自己。所以,學生應該透過大學開放日、資訊日,搞清楚到底自己真係鐘意啲咩學科/學院。鐘意地球科學嘅,千祈唔好誤以為自己鐘意地理。鐘意研究管治國家方略嘅,千祈唔好誤會自己係鐘意歷史。

2. 了解學科收生要求

廣告

揀定學科,就要搞清楚到底人哋要咩條件。學生固然清楚只得33222係唔會有大學讀,然後呢?

每間大學有佢哋一啲基本要求,會將某啲學科嘅分數倍大。例如港大就好睇考生嘅英文科成績,所以如果英文成績一般(預計4或以下)嘅同學,奉勸你唔好玩殘自己。

此外,每個學院,甚至每個學系,其實都有佢嘅收生要求。點解要去大學嘅資訊日?其實就係要去了解一下每個學院、學系有咩特定嘅要求。舉個例子,如果你係想揀工程學院,數學必修部份、M2、物理嘅分數好大機會會有額外嘅加權。「乘大」幾多?就要你自己去搵出嚟!

3. 小心閱讀統計數據

JUPAS每年都會放返每個學科/學院嘅收分數字。大部份人其實只係識得睇平均,識得睇最高同埋最低果個已經好叻。

昃sir都有同自己嘅學生講過,昃sir係有啲人格分裂。一方面我對教育有自己嘅理想,但同時間可以比其他人更功利。不幸地,功利嘅昃sir夠膽講根本絕大部份學校嘅老師唔完全明白JUPAS呢個遊戲點玩。

JUPAS會公佈嘅數據,就係昃sir做資料搜集嘅基礎。不過昃sir會睇曬所有已公開嘅數據,去留意學科/學院收生嘅趨勢。每年都上升或者無變動,呢啲就最簡單,自己睇餸食飯就得。

但如果收生數據有飄忽不定的話,就要非常小心。有上有落嘅,就要估計今年係屬於高定低嘅一年,而且有準備要反其道而行。上年收得低嘅,今年就要相當小心。上年收得高咗,而又未形成一個穩定趨勢嘅,就你懂的…

4. 面試前做足準備

坊間嘅面試工作坊講太多自我介紹技巧,基本上都可以掉咗佢。收到信叫你去interview係成功嘅一半。留意吓email俾咗啲咩線索你,例如係邊個send或者有咩你自己以外嘅recipient(s)。你有興趣知到底應該點做,就pm全民教育局個page,等我哋同你傾吓計。

總結

其實揀大學入咩科,好大程度上同追女仔/男仔、用app等巴士一樣。資訊就公開嘅、誤差就必然有嘅,但係你會點樣善用你嘅資訊去解決問題,就八仙過海,各顯神通啦!

PS: 如果有任何有關JUPAS選科嘅疑難,請pm全民教育局嘅fb page,或者dm去我哋個IG到。Sorry,昃sir唔鐘意snap。老土咗,唔好意思。

發表意見