立場新聞 Stand News

Mall 姐可以,點解領展唔可以?

2017/5/15 — 13:07

劇集《不懂撒嬌的女人》一幕

劇集《不懂撒嬌的女人》一幕

【文:林勉一】

女友呢期追睇《不懂撒嬌的女人》,我就跟住睇下。

廣告

自己打過地產商嘅工,做商場leasing真係要做到好絕,追target、睇住租戶條數加租、要求多多,無非都係要搞到個場最旺,租金條數最靚。唔符合要求或者應付唔到加租嘅租戶就要拜拜,商業世界就係咁,唔係開善堂。 現實世界嘅Mall姐s,總有一個響左近,除非你做到好似西九龍中心咁賤到離晒大譜,趕走人地賣平雪糕兩母子之後,仲要出post串啲市民引發公憤,否則大家對呢啲Mall姐s習以為常。

我地成日見到人鬧領展點樣衰格,例如點樣加租迫死啲幾十年街坊生意、迫啲小商戶駛幾十萬豪裝舖面、賣走啲盈利少嘅商場變孤島、賣斷商場之後新業主加社福機構租、外判街市又整走晒啲商販變做外判商自己做晒、搵啲蒙面爛仔扮保安睇場打人。呢啲嘢現實世界啲Mall姐s都會做,咁點解你地淨係針對領展?

廣告

原因好簡單,因為領展控制住香港一半家庭住緊嘅公屋嘅商場。本來啲場係房署管理,大家幫襯啲街市檔口、熟食、茶餐廳、文具舖、士多幾十年,雖然就唔靚又唔高格調,但至少係街坊生意。到俾晒領展之後,好聽叫私營化提高效率,實際上就係將大商場業主chur到盡嘅做法引入。

唔好忘記,領展比起好多大地產商更大鑊嘅地方,係佢響好多只有公屋居屋嘅地方都幾乎壟斷晒區內商場街市,咁就佢玩晒了。你地想有街坊茶餐廳文具舖?慳啲啦你,食元氣大家樂麥記飲Starbucks啦!嫌貴呀?嫌幾十年感情嘅舖頭冇晒呀?唔chur到你地盡我點同啲股東交代呀?唔通搵林文龍同啲股東講話公屋居民生活受影響所以以後唔追target賺少啲呀?

邊個打靶推動領展上市又唔學港鐵咁保持政府嘅控制權?呢條友叫董建華,領展只係佢任內其中一樣「傑」作,到咗林鄭做,呢條友同佢班團夥仲係左右大局。大家見到領展點衰格嘅時候,千祈唔好忘記董建華呢個老而不。

發表意見