立場新聞 Stand News

「X,呢啲嘢我唔L用嘅」

2017/12/1 — 20:09

有朋友笑我,寫嘅嘢總係慣性地偏幫啲後生仔。我話係呀,擺到明的。

「班後生真係咁好咩?」朋友問。

唔係話有咩特別好,只係我又唔覺得特別差。我偏幫,係因為我唔抵得班老鬼唔駛本咁踩佢地。實際上,叻人同廢柴,每一代人都有,而且分佈平均。呢一代如是,上一代如是,下一代,又或者下下一代,都會如是。甚麼一蟹不如一蟹?多L如啦講真。

廣告

每一代人都唔同,所擁有嘅 quality 都唔一樣。可以肯定咁講,我呢代人啱用嘅生活智慧同哲學,去到下一代,應該好多都變成obsolete。佢地唔會識我地識嘅嘢,佢地只會識嗰啲,喺佢地個年代啱用嘅事。咁佢唔識我地識嘅嘢,係咪就係好廢呢?唔係吖嘛。以前有個阿叔同我講,話我呢啲後生一代廢廢地嘅(四張嘢都話我後生?!),個個嬌生慣養唔捱得,如果依家打仗我肯定死L先。我話,係吖,但阿叔,我喺戰後和平咗好多年之後先出世吖嘛,打仗時嘅求生能力,我有乜可能勁得過你呢?又話時話阿叔,你識唔識得用智能電話呢查實?

「X,呢啲嘢我唔L用嘅。」阿叔答道:「我要個電話淨係打出打入,講到嘢就得啦。其他嘅我根本就唔需要識。」

廣告

「哦 …」我笑著點了點頭。我知世界的確係好亂,戰亂又真係隨時一觸即發。但在勉強還算「太平」嘅香港,唔懂得喺打仗時嘅求生術就 considered as「廢廢地」,但唔識用智能電話卻係理所當然。呢個邏輯,真係可以講得通?

呢個 conversation,我記憶中應該係三、四年前嘅事啦。呢個 uncle,最近我有見過。佢用緊部 iphone8,佢話,係個仔送俾佢㗎喎。

「都唔知要嚟做乜,難用到死。」阿叔說:「你地啲後生嘅真係多鬼如的。」

「都唔係嘅,你個仔一番心意,孝順你遮。」我說:「又講時講,有部智能電話旁吓身,隔離左右有咩爆鑊,你會即時收到 notification 嘛,到打仗嘅時候,走佬都走得快啲嘛。」

祝大家有個愉快嘅週末。

發表意見