立場新聞 Stand News

世界盃巴西伯伯

2018/6/28 — 12:00

圖片來源:作者 Facebook 圖片

圖片來源:作者 Facebook 圖片

仲記唔記得上屆世界盃,每逢巴西比賽都有位拎住個假世界盃嘅鬍鬚伯伯?呢位伯伯支持咗巴西 25 年,但 3 年前佢過咗身,今屆佢兩個仔仔決定代父出征,帶住爸爸個世界盃夢去俄羅斯,延續爸爸嘅快樂精神。

作者 Facebook 圖片

作者 Facebook 圖片

廣告

但我發夢都估唔到,我居然可以喺巴西鬥塞爾維亞嘅現場遇到佢兩個,仲要坐喺我隔離一齊睇波!!!! 個機率係 44,000 人份之 2!!! 開頭我都懷疑係咪佢兩個,然後我畀張佢張相佢睇,佢話呢個真係佢爸爸。我再望真啲,佢唔止帶住爸爸個世界盃,仲帶埋佢頂帽。

廣告

早前報道話,佢兩個唔止要延續爸爸嘅世界盃夢,仲要將快樂帶畀球迷,佢兩個由開波到完場都係帶動氣氛,無停過嗌之餘仲叫球迷企住一齊嗌,其他球迷都畀佢嘅熱情感染,我夠膽講,我坐嗰面係全場最 hyper!

佢兩個真係講得出做得到!

最後巴西 2:0 贏咗塞爾維亞,完場之後,佢兩個突然靜咗一靜,然後親吻咗一下個世界盃,再手指向天,我相信唔使多講都知係做咩。

雖然佢爸爸睇唔到佢兩個仔有幾生性同孝順,但我相信伯伯一定會知道嘅 —

呢場波好好睇,但遇到佢兩個,先係我今場波最大得著。我嘅世界盃夢,真係無遺憾…

原刊於作者 Facebook

發表意見