立場新聞 Stand News

唔好以為一兩下小動作冇咩嘢

2018/7/11 — 14:16

麥巴比(直播片段截圖)

麥巴比(直播片段截圖)

真係忍唔住要鬧麥巴比,好學唔學學埋尼馬咁多啲小動作。

唔係話唔畀拖延時間,你咪喺佢面前阻下佢開波咪算囉,真係唔需要做到咁多手多腳,又要帶走個波又玩下花式,最後畀比利時班球員圍仲要扮無辜,最後食黃牌呢下真係自己攞嚟。補時嗰陣仲有一下同維頓漢爭波,人哋 hi 一 hi 到佢,佢就中槍倒地咁勁大反應,真心做多咗。

其實上場八強麥巴比都有幾下令人討厭嘅小動作,明明自己撞埋去人哋度扮嘢倒地嗌救命,呢幾下真係幫唔落。

廣告

唔明點解係要咁輕挑咁多呢啲無謂嘅動作?講真,你真係好好波,點解唔專心踢好每一球波,腳踏實地用球技服人?唔好以為呢啲唔覺意一兩下小動作冇咩嘢,係足以摧毀你嘅形象,因為你話緊畀人聽,你就係一個咁多討厭小動作嘅人。

當你仲年輕沉唔住氣,但如果真係想做世界第一,球品係同球技一樣,都係咁重要。

廣告

 

標題為編輯所擬,原刊於作者 Facebook

發表意見