立場新聞 Stand News

抱歉,我都係唔同意噓舒米高

2017/7/24 — 11:48

圖片來源:李斯特城 facebook

圖片來源:李斯特城 facebook

出咗「去大球場唔應該著世仇波衫」之後,好多師兄話「嘩,版主一定係利迷!」我地話,我地出任何post唔係為咗撐利記或反利記,亦唔係撐曼聯或反曼聯,而係只想足球有基本尊重,包括喺香港。

出咗「唔明點解舒米高被噓」之後,好多師兄話「嘩,版主一定係曼迷!」我地想話,我地出任何post唔係為咗撐利記或反利記,亦唔係撐曼聯或反曼聯,而係只想足球有基本尊重,包括喺香港。

喺舒米高被噓之後出post發問,心裡當然知道有舒米高家世呢個可能性,但仍真心希望求解係有其他原因,畢竟情況奇特…結果除咗呢個答案,最多師兄解釋係「開龍門球/死球開得好慢/拖時間dum波鐘」。

廣告

的確,客觀而言舒米高係喺比賽幾次都開得比較慢,如果以噓聲催佢開波亦算係合理。但為咗核實呢個答案並非家世相關,我搵咗全場比賽完整片段重新翻睇。

回顧比賽初段,舒米高比賽第一次被噓喺比賽5:39,其時佢接應後衛回傳,用腳接球後2秒之內將波踢出。但既然已經喺2秒內踢走個波,咁俾人噓應該唔係因為今次,而係由於之前嘅行為拖時間令人不滿。咁又再睇返之前舒米高做咗咩拖時間,總計參與比賽如下:

廣告

2:59接實古天奴遠射
3:26接應回傳,3秒內踢走個波
4:10接應回傳,first touch踢走個波
4:23回收對手長傳失誤,1秒內踢走個波
5:39接應回傳,2秒內踢走個波,被噓

亦即係話,喺被噓之前,舒米高係冇做出過任何拖延時間嘅舉動,但已被身後利迷噓爆。加上後來舒米高無論開波開得快定慢,甚至只接應回傳解圍甚或任何情況下觸球,已經被噓到爆,亦印證被噓同拖延時間冇關係,遑論四強開波唔見得特別快但安然無恙嘅軒尼詩。

所以舒米高被噓嘅答案亦昭然若揭:因為老豆踢過曼聯。呢個係噓伊雲斯同沙夏嘅威力加強版,其實本來已對噓爆兩人好有保留,畢竟兩人雖踢過死敵曼聯,但效力其間既非主力,其間對陣利物浦亦無特別說話或仇怨得罪利記,甚至沙夏夾埋為曼聯上陣咗4場咁大把,其後更不歡而散,有相當部份曼聯球迷係唔鍾意佢嘅(佢踢完場波喺網上透露被曼聯利記球迷同時網上攻擊),所以噓爆兩人已經有點那個…

而舒米高就更加無辜,曼城青訓,但即使老豆做龍門教練仍輸比祖赫特,總計只為曼城上陣10場,之後發奮由低踢起,由英乙諾士郡踢到英冠列斯聯踢到英冠李斯特城踢到升班踢到拎英超,呢個勵志故事相信唔少在場嘅利迷亦俾咗唔少like,但而家就純粹因為老豆係曼聯功臣而被無情噓爆,喂大佬,我嘅仕途成就可以靠一雙手撲出一片天,但我老豆踢過咩隊可以靠咩控制,靠咩改變呀?

高普讚香港利迷俾佢感覺到50%晏菲路氣氛,的確,開場時全場利迷一齊唱會歌真係好震撼,果刻嘅感覺真係有啲似置身英國睇英超一樣,令全場係咪利迷都情緒高漲,利迷營造到咁好嘅氣氛,相信背後花咗唔少努力,值得高普稱讚。

你或者會話,就係因為我地想營造到晏菲路咁,所以咪噓晒所有同死敵曼聯有關嘅球員,包括舒米高囉!但我肯定噓舒米高唔係呢50%晏菲路嘅構成部份,因為我又翻查返上季利記主場對李城(2016年9月10日)片段,即使當時舒米高已係衛冕英超冠軍,老豆亦的確踢過曼聯,但當佢觸球時,真.晏菲路根本冇噓佢,所以相信舒米高甚至高普/利記球員亦對香港利迷呢個舉動不明所以,如果唔噓,分分鐘唔止50%…

晏菲路之所以係歐洲最震撼人心嘅球場之一,唔係因為啲利迷怒噓死敵球員,而係因為佢地真係好全心全意支持愛隊,用盡所有聲音力氣去聲援球隊,果種120%嘅訓身撐住隊波,同球隊共患難共生死,果種浪漫同熱血先係晏菲路嘅迷人之處。噓敵人都會,但只係喺對手犯規、球證不公時先會噓,或者某人曾講過針對利記嘅說話或曾踢傷利記球員先會針對噓佢,唔會無情情就因為對手身份而噓。唔信?睇下呢條片,就算全盛時期嘅曼聯,係死敵曼聯本尊作客晏菲路,控球亦無任何噓聲,只有支持利物浦嘅歌聲,可見晏菲路即使的確視曼聯如仇敵,但唔代表會無原因地狂噓對手。

所以或者係香港利迷真係好想製造到晏菲路嘅氣氛俾難得訪港嘅愛隊,最後太心切反而做咗啲原來真.晏菲路都唔會做嘅行為。你或者話「超,我鍾意做咩咪做咩,噓邊個咪噓邊個囉」但晏菲路同樣熱血如火,狂熱程度相信唔會輸比香港球迷,但同時絕對唔會失去尊重呢個大原則,尊重對手,以至尊重歷史,尊重傳統皆出於同一種尊重,場下可以同曼迷網上瘋狂開火,但場上絕對保持基本尊重,正因為respect呢個字,晏菲路以至利物浦先會成為一個咁熱情迷人嘅信仰,而冇將熱情演化成憤恨。如果晏菲路真係憤恨到父債子還咁誇張嘅地步,恐怕一早就好似土超主場咁擲煙花射綠光laser擲銀幣去仇敵球員度,而冇咗晏菲路之獨特性了。晏菲路球迷都有權話「我鍾意噓邊個咪噓邊個囉」,但佢地選擇咗唔咁樣做。佢地選擇嘅,只係響亮震天嘅歌唱聲而已。

出咗「去大球場唔應該著世仇波衫」之後,有朋友問「嘩,做乜出啲咁爭議既post」「好多負評好多unlike喎」「好多人鬧緊你話你係利狗版主喎」。其實,你估我地寫post之時又冇諗過咩?我地大可以暢談風花雪月,出下精華出下古天奴嘅精彩射門就大家歡喜,冇負評冇unlike冇爭議,只係我地覺得,既然足球喺香港咁熾熱咁精彩,點解唔值得更多尊重呢?講真今次英超挑戰盃真係幾難忘嘅體驗,但如果其間冇人著4隊參賽隊伍嘅世仇波衫入場,利迷又對伊雲斯沙夏舒米高網開一面的話,就會係一個既難忘又respectable嘅完美體驗了。兩件事講緊既雖然分別係曼迷同利迷,但其實係出於同一種尊重。尊重自己,尊重場合,尊重他人,僅此而已。

我地重申,我地出任何post唔係為咗撐利記或反利記,亦唔係撐曼聯或反曼聯,而係只想足球有基本尊重,包括喺香港。所以希望大家喺留言討論時,可以盡量避免人身攻擊其他球迷,以及避免用猁、獌、軌、妓、鏝、熱狗等惡意詞語,其實都係出於同一種尊重。

發表意見