立場新聞 Stand News

星如應火速邀公平擇日重賽

2017/10/8 — 14:47

相:曹星如賽事直播截圖

相:曹星如賽事直播截圖

曹星如勝河勝公平,唔係個個香港人開心,好多人狂屌,質疑點解拳賽馬上中止,點解俾人打腫眼果個會贏。當然啦,又有人反屌,話唔識拳例唔好扮專家啦,叫人自己去睇拳例,其中一方受傷(據講是外撞頭accidental headbutt),打夠幾多個回合,裁判有權終止比賽,並以點數決勝負云云。

其實呢個就係我鍾意香港人之處,夠公平!唔會因為香港選手出賽,贏左就一定開心。唔識規例又好,懂規例又好,其實任何裁判決定,都可以受人質疑,足球賽事例子極多。所以我認為,即然賽事係因為星如今場受傷而中止,曹星如一方如宣布自己傷好後再邀河野公平擇日重賽,既可以贏盡人心,又可以賺多一筆,一石二鳥。

香港人之所以屌,係有原因,唔想香港變成中國:為左面子、為左利益,不擇手段,吹黑哨、搬龍門。做人如果勝之不武,倒不如雖敗猶榮,我覺得呢一點先至係香港人精神。至於乜鬼打不死精神,係任你講架遮,任何國家嘅運動員,基本上都係有打不死精神架啦,個個咪又係屢敗屢戰!

廣告

香港相對於我地賤視嘅中國,就係香港人重視公平!

好多人話香港人屌來屌去唔啱,唔識唔應該亂評論。但我覺得冇問題。香港就係言論自由之地,天下悠悠之口難以杜絕,有質疑覺得心裡唔服就出聲。我反而覺得,主辦單位、轉播單位及其他眾多媒體安排唔夠好。好似我睇HKBN直播,冇安排現場旁述,畫面又冇出每回合分數,然後無端端睇拳證舉起曹星如隻手話佢贏左,真係好無厘頭。

廣告

觀眾唔識係正常架喎。但咁重要嘅賽事,一眾媒體冇請啲資深有分量嘅評述人員去即時講解,先至係大問題!喂,阿哥!我細個睇波同睇馬,我都有得睇林尚義同董驃啦。我即使到依家都唔係球迷馬迷,但至少我睇下呢啲資深人士去現場評論,可以學到啲嘢,略懂一二,對與錯,雙方表現如何,賽果是否合理,裁判有冇誤判等,我心入面可以有個準繩。

總結我兩大建議:1. 曹星如一方立即邀約河野公平在星如傷癒後擇日重賽。2. 下次再有香港代表出場的拳賽,各大媒體要做好啲,安排資深人士,又或者至少係搵識講拳嘅主持現場評述。依家咁多網媒,臥虎藏龍,一定做到!

發表意見