立場新聞 Stand News

艾馬利接任新廠長 四平八穩不過不失

2018/5/24 — 10:48

艾馬利,圖片來源:阿仙奴 facebook

艾馬利,圖片來源:阿仙奴 facebook

終於都官宣咗啦,艾馬利接任新廠長。如果問我,相比起阿迪達,我都傾向揀佢多啲嘅。論到經驗,點計都係佢高一籌嘅。

但係對佢期望大唔大呢?老實講,其實又唔係好大。雖未至於悲觀,不過呢個 appointment,肯定唔算係「充滿希望」嗰隻。當年高普去教利物浦,期望就真係大啦。艾馬利教阿仙奴,我諗極其量都只可以話審慎樂觀啦,我諗大部份球迷都係同我感覺差唔多,都係觀望為主吧。

艾馬利俾我感覺係 … 四平八穩,不過不失。講唔出佢有乜嘢唔好,但亦唔係好講得出佢有咩特別好。比較令人留低深刻印象嘅,係佢響西維爾同華倫西亞時期,面對資源緊絀,主力年年賣走嘅歲月裡面,依然能夠帶領球隊打出唔錯嘅成績。喺呢個角度去睇,佢堅係好啱阿仙奴嘅「一貫作風」的。到佢帶PSG嘅時候,emmm,唔係真係話好差,只係覺得,佢有啲鎮唔住咁嘅 feel 囉。

廣告

又據講,艾馬利係個排陣佈局非常精細嘅教頭,相比起喜歡比球員自由發揮嘅雲加,響呢個年代嘅足球裡面,我諗應該算係一個正面嘅改善。另外,佢英文好似話麻麻地 … 假如佢響PSG嗰陣都係麻麻地鎮得住班球員,現在更加多咗一樣語言障礙,其實會唔會有啲雪上加霜?

ok,上面講嗰啲,全部都係吹嘅遮,毫無根據的。可能佢最終會好掂都唔定。不過,若然佢唔好彩真係失敗而回,我反而覺得,最大嘅可能,恐怕係球會新嘅權力架構,多過佢本人嘅能力問題。雲加在位二十二年,大權在握,乜都係佢處理晒。去到後期成績唔好,我覺得好大程度係因為佢要兼顧嘅事情太多,而令佢應付唔嚟。雲加離開,最大嘅改變唔係個教頭換人咁簡單,而係成個管理架構嘅改變:由獨攬大權變為分權管理。現代足球事項繁多,舊式嘅一人管理好明顯不足以應付,走向歐陸化分權管理,大方向我諗係正確嘅,只係呢個過渡期,其實應該都幾大震盪,球會上下人人都要習慣。分權管理取長補短互相制衡唔係唔好,但萬一管理層之間有乜心病,各懷鬼胎之時, damage 恐怕比單人獨攬大權嘅 football manager 嚟得更大。一個大權在握嘅 manager 唔掂,你一嘢炒咗佢就可以止血。幾派人玩內鬥,你炒幾多次領隊都無補於是。所以呢,阿仙奴呢幾年有冇起色,邊個係 head coach 我諗未必真係咁大影響,反而係呢個管理模式嘅過渡做得 smooth 唔 smooth,先至係關鍵。

廣告

對於呢樣嘢,我極極極希望會係順順利利的。不過,又據聞,現在好似話,班主高安基開始交捧俾個仔去做 … 而我對普遍富二代嘅 ego,與及佢地處理人事問題嘅手法,不嬲都係有啲偏見的。

希望係我錯吧。

(標題為編輯所擬)

發表意見