立場新聞 Stand News

街場打龍

2017/7/28 — 12:48

龍門,可能係足球場上最少人自願擔任嘅位置,畢竟人人都想出嚟踢㗎啦,但當冇專業龍門時,幾唔想打都好,都要搵個人做龍門,呢個時候就會出現以下情況……

【猜輸打龍】

「知唔知我係邊個?包剪揼港隊代表!」

廣告

人人都心想事成,就會天下大亂,唯一最公平、用最文明嘅解決方法,就係猜包剪揼(有時候會玩包揼、剪包、包剪、揼剪、多出少做……)。猜剩最後兩個就係最緊張時候,猜輸嗰個就會扯晒哮:「我屌,又係我做龍!」猜贏嗰個通常會拋出一句:「話咗係你做㗎啦!想贏我省港澳包剪揼代表隊?」、「死入去做龍啦!」

【入波打龍】

廣告

「最公平,入波嗰個打龍,一於咁話!」

當處於大家唔願猜龍嘅膠著狀態,呢個時候總會有條契弟忽然提議:「入波打龍」(通常講嗰個人係最冇可能入波)。正因為咁,去到龍門口死都唔肯起腳,係都要猜番出嚟,直至去到無可奈何要起腳先入,然後入波嗰個就會死死地氣死埋去龍門口:「哎呀,入波要打龍呀。」

【被逼打龍】

「我唔係好識踢,可以踢咩位?」
「龍門啦!」

被逼打龍情況,係每個初學者必經階段,因為龍門呢個位置唔使腳法(你以為)、唔使技術(你以為),你唔驚波就得,而最大原因係唔想俾你出嚟踢「搞彎」隊波。(註:唔會分配頭盔、護目、手套等保護裝備)

【踢到攰打龍】

「喂……攰呀,你踢,我打龍……」

隨住年紀愈大,體力愈係後勁不繼,以前走足全場未喘氣,大個咗衝幾次刺就扯哮兼擰頭。夠人嘅話都仲可以換人,唔夠人就要輪流打龍,踢到攰就係最自願打龍嘅時候,分分鐘你想打龍都冇得你打,因為打龍嗰個都係攰先打龍:「唔換呀,我攰,你繼續踢。」

【真心想打龍】

識打龍同左腳球員,從來都係可遇不可求。當然有人真係鍾意打龍,但多數都係對面隊。

【失波打多次龍】

「你特登㗎?打多次龍啦你!」

雖然冇明文規定,但大多數情況都係失波先換龍。唔想打龍嘅人,就會放水扮守唔到(只限冇人跟隊嘅時候),但如果放水太明顯,通常會被隊友屌番轉頭,然後叫你守多次,最後偷雞唔到蝕渣米。

【未掂波打多次龍】

「龍門未掂波,打多次龍啦你!」

有時候入波唔需要好長時間,可能第一個攻勢就「NEXT」對手。除咗失波換龍之外,有時贏波都會換龍,但唔好意思,龍門未掂波通常都會「被要求」打多次,鬼叫你未掂波。所以打龍嗰個最希望後衛回傳一下,掂一下波都叫掂呀!

【咁都射唔入死去打龍】

呢個情況最常見於前鋒失機,隊友即時大叫-

「咁都射唔入,死去打龍啦!」

我試過,我真係試過,但係……

我啋你都戇鳩!

 

原刊於足球說故事

發表意見