立場新聞 Stand News

講吓山神、奧燒同拿卡錫迪

2017/7/6 — 20:04

阿仙奴球員 Alexis Sánchez、Mesut Özil、Alexandre Lacazette

阿仙奴球員 Alexis Sánchez、Mesut Özil、Alexandre Lacazette

今日寫啲趕客嘢,講吓一堆阿仙奴嘅轉會同續約新聞。

山神

今日嘅新聞係,佢向阿仙奴提出條件,如果加人工到40萬鎊一個星期,佢就肯續約嘞。

廣告

首先呢單料係鏡報傳出嚟,咁鏡報有幾信得過,大家怕且心裡有數吧。不過,老實講我覺得足球員其實鍾意錢嘅,遠多於甚麼trophy呀、歐聯資格呀、爭勝心呀之類。山神係鬥心強,不過錢事實係可以彌補好多嘢嘅。

然而山神若果唔留隊,佢嘅option,其實都係不外乎拜仁同曼城。真係要贏好多冠軍嘅話,咁梗係去拜仁啦,打半季都分分鐘聯賽榜帶街嘞。不過拜仁講到明嫌山神人工貴,即係唔駛諗啦。咁曼城呢?以前曼城出嘅人工,可以壓到勝地高阿仙奴一大截,但近呢幾年,其實都已經收窄緊了。英超最高人工,曼聯嘅普巴收緊29萬,曼城最貴嘅兩個,都係緊24萬,阿記開出27萬5一個星期,坦白講其實都算係唔失禮啦。而且27萬5,應該仲有價講,我斷估咁講,上到3字頭應該有啲機的。據講山神話要做英超人工最高嘅球員,以阿記一貫街市買菜式嘅講價模式,唔知會唔會開出嗰啲類似29萬零一鎊之類嘅offer,緊緊高過普巴就算呢?

廣告

當然,如果曼城班中東油王癲起上嚟,真係肯俾40萬,咁咩都唔駛講啦,山神個心一定飄咗過去啦。至於講爭勝呀,捧杯機會呀…我知阿仙奴係唔多爭氣架啦,不過,今時今日嘅曼城,其實又真係幾有保證呢?

********

奧燒

首先,據講佢係冇咩market嘅。你話佢勁唔勁呢?咁係好波嘅,但係佢貴囉,兼且係個錦上添花形嘅球員,多過可以一人孭起隊波嗰隻;有幾多人肯俾咁貴人工要佢吖。

加埋最近又話續咗響酋長球場個包廂,又響倫敦買樓…佢想留隊個意向,應該都好清楚了。唯一傾唔掂嘅,係份糧㗎遮。

咁伙計同老細響自己值幾錢呢個議題上面,永遠係有天同地嘅分歧嘅。你出面有market,好似山神咁,咪有多啲bargain power囉。冇market嘅,就唯有用個坐隔離嘅同事個價嚟做reference拗數囉。

咁,如果我係奧燒,我係死拖爛拖,點都等到山神搞掂份約先出手的。山神如果留隊,份糧肯定唔差得去邊,咁到時就可以用阿山神份糧做reference,去bargain自己份人工。雖則話,山神響隊中既重要性,比奧燒高一截,但話晒佢地兩個都算係隊中the only 2 叫做世界級球星(雖然世界級個range都好闊吓),人工差距,應該唔會太過大的。又,如果山神走人,咁仲好拗。你走咗咁大粒星,唔係唔俾多啲錢留我下話?我到時對住傳媒暗示幾句你地冇心爭勝留住隊中球星,你班管理層唔俾人鬧到仆街?再講,你慳咗山神咁大舊人工,應該大把budget加俾我啦,下話?

我死都等山神搞掂先啦。

********

拿卡錫迪

有人話佢好勁,又有人話佢水貨味濃。國家隊佢仲要排響銀河唯一後面,值唔值咁貴呀?

我對佢嘅諗法係,買佢,可能已經係市場上面最搏得過嘅交易了。特別係之前老吹話,億幾鎊買個十八歲踢咗一季好波嘅新星,相比之下,我寧願好似依家咁好過囉。

至於將佢同基奧特比,唔多公道嘅。兩個打法相差咁遠,點比呢?不過響雲加眼中,我相信佢會認為,拿卡錫迪應該啱阿記個體系多啲嘅。基奧特呢,我同好多人諗法一樣,做後備奇兵應該一流…如果佢肯嘅話。

我對拿卡錫迪,坦白講有少少期望嘅。得嘞得嘞,球迷都係只可以響呢啲時候有得J吓架遮,你由得我啦。

法國神鋒嚟到英超要打個折頭吖嘛,其實我知道嘅。

 

(標題為編輯所擬;原刊於作者 facebook

發表意見