立場新聞 Stand News

「踢波唔撞得?返去打乒乓波啦!」

2017/7/26 — 13:41

作者製圖

作者製圖

標題呢句說話,街場最常聽到,而我自己都曾經俾人咁樣鬧過。

踢波從來都會有身體碰撞,「得位」、「拎位」、「食身位」、「埋門」、「剷波」,根本係不可避免嘅事,只係有時被撞嗰一方不滿對方「過度侵犯」:「踢波啫,使唔使嘢嘢撞埋嚟咁狠呀?」而對方認為根本冇錯,於是回敬一句:「唔撞得?返去打乒乓波囉!」

罵戰,由此而生。雖然無禮,但不無道理。

廣告

踢波有邊個唔想輕鬆過人?當然有啲人可能好茅,專登踢你,但其實有啲人只因身體有明顯優勢而令人覺得佢「惹火」,只係每個人對犯錯嗰條尺都有唔同界線。

其實落得場嘅場人人都搏,我未有小朋友,但我都會知道家長一定會緊張小朋友安全(我係成年人,去親踢波老竇老母都會叮囑我小心),但係你冇可能下下用個防護罩罩住佢,將佢變成「Iron man」。依家係踢波,唔係玩閃避球呀。

廣告

老實講,小朋友自己都好怕撞親,而佢哋亦未必真係有機心到特登整傷對方,如果因為些少正常身體碰撞都受唔住,認為咁樣係有問題,要求教練立刻暫定比賽,甚至追究責任兼追討賠償,咁樣其實就算轉打冇身體對抗嘅乒乓波,令郎都會有受傷機會。

個乒乓波咁行飛埋落我個仔身上,打中佢會好痛,到時中眼點算?點解唔提供面罩?

嗰塊乒乓拍都唔啱我個仔手形,搞到佢隻手好痛,點解冇教練幫佢搵塊啱嘅拍?

得罪講句,就算俾個施治頭套戴住,到時落地受傷擦損,又會賴冇護膝護肘、俾人踢親眼睛都會賴點解冇護目鏡等等,要賴嘅,總會有嘢賴到。保護小朋友,唔係過份保護到連正常嘅碰撞都當成不合理。

一朝被蛇咬,十年怕井繩,我唔知呢位小朋友經過今次呢件事之後,佢仲有冇機會打龍?甚至嚴重啲,仲會唔會有機會踢波?

 

男童守龍門傷眼索償 原告母親︰教練應教戴頭盔保護

原刊於足球說故事

發表意見