立場新聞 Stand News

【今朝澳門真係好大雨喎】「暴雨停課」原來係演習 全澳市民怒了 官員一句道歉都未有

2016/3/21 — 12:06

作者製圖

作者製圖

今朝澳門大混亂!唔係咩恐襲,而係大災難!「關公」大災難!今日早上近七點,本澳下大雨,而澳視新聞在節目上打出暴雨停課消息,但不久教青局即稱聲原來只是演習誤報,叫大家如常上學。學生們同家長們急忙又趕翻學,導致交通擠塞、街上罵聲四起,有網民話如果唔係要趕翻學,真係想包圍政總咁話。澳視新聞已就事件作出致歉,教青局事後均解釋是溝通上現問題,但至今向受影響的居民和學生一句道歉都沒有,譚俊榮早上見記者時,更說「我都係啱先先知」。

原來,係教青局同電視電台同埋部分學校,約埋今日玩停課演習喎!根據澳門電台報道,教青局教育廳廳長梁慧琪在本台時事節目《澳門講場》中表示:

「教青局 2001年起均會於 3月中至 3月底舉行演習,準備雨季、風季來臨,參與部門包括政府 4個部門、電視、電台,以及部分學校。今早的演習已於 3月11日聯絡相關部門,演習在清晨 5時許啟動,6時半開始。局方在發現電視台播放停課訊息後已聯絡電視台,電視台承認出錯,局方要求更正。局方又話稍後會同媒體,包括電視、電台就停課的通報再溝通,希望不斷優化溝通機制,局方亦會增加自行發布訊息的渠道,包括增加微信帳號。」

廣告

而澳廣視中文新聞部亦透過電台新聞就今早誤報中、小、幼及特殊教育學生的停課資訊表示歉意。基於教青局通知時想即時向市民發布資訊方便安排出行,忽略了通知實為演習的訊息,日後會加強資訊核實,避免同類事件再次發生。

據電台報道,有聽眾投訴訊息出現混亂,又無法登入教青局網頁核實。梁慧琪稱,局方已與電信公司商討加大流量。她又稱,會呼籲學校避免因今次訊息混亂處分遲到的學生,亦明白學校十分人性化。而有學校表示今早沒能按時回校的學生不視作為遲到。

廣告

而培正校長高錦輝表示,今早約 7時看到電視發布停課訊息,當時行政人員曾嘗試瀏覽教青局網站,但網站不能運作。由於相關訊息已經在家長之間流傳,而且接近學生出門時間,故校方選擇相信電視台資訊,向學生發出停課短信。

但即係咁,天未光已經落好大雨,連個天都配合得咁逼真,當局唔會諗到依個演習係咪應該要改期呢?而這個只有TDM和部分學校知悉的「內部演習」,竟連內部都有人誤當是真,難道核心的內圍也處於核心的外圍嗎?

一個原本只屬小圈子的演習,弄得一個「全民災難」,學校、家長、學生被弄得氹氹轉,TDM道歉了,教青局一句道歉都無還解釋告訴大家「唔關教青局事」,而社文司譚俊榮更話自己也想知究竟發生咩事。難怪有網民話「D官員幾時演習下台」?

 

原刊於愛瞞日報Macau Concealers
 

發表意見