立場新聞 Stand News

澳門中聯辦指示傳媒:「反攻網絡」

2016/2/1 — 14:24

「喺2014年澳門政府打算強推《離補》法案嘅時候,傳統傳媒幾上幾乎開盡去舖天蓋地唱好《離補》法,但最終仍觸發咗澳門自1989後最大規模嘅抗議行動。」— 圖片來源:論盡媒體

「喺2014年澳門政府打算強推《離補》法案嘅時候,傳統傳媒幾上幾乎開盡去舖天蓋地唱好《離補》法,但最終仍觸發咗澳門自1989後最大規模嘅抗議行動。」— 圖片來源:論盡媒體

澳門中聯辦每逢農曆新年前前後後都會宴請澳門各大傳統媒體高層,新興網媒例如《愛瞞》當然冇份。喺今年飯局上,中聯辦公開要求澳門傳媒「在主流輿論中定向定調,樹立大局意識,並堅持愛國愛澳的方向」、「把媒體影響力向網絡空間延伸」。

中聯辦人員喺公開致辭指示本地傳媒嘅工作方向,相信目前喺香港仍無法想像(未來係點就唔知)。

廣告

的確,近一兩年澳門嘅網媒「製造影響」嘅能力已超過傳統電視同報紙。例如,喺2014年澳門政府打算強推《離補》法案嘅時候,傳統傳媒幾上幾乎開盡去舖天蓋地唱好《離補》法,但最終仍觸發咗澳門自1989後最大規模嘅抗議行動。而最近,《愛瞞》已成為澳門人重要嘅爆料渠道,澳門多個政府部門似派人日夜𥄫實《愛瞞》有咩不利自已部門嘅報導,一有事就極速出新聞稿或開記者會回應。

以前,網民以一事件被「推上報」嚟形容網上「虛擬世界」影響力可推向「實體」。依家以網上為首要傳播媒界已經係常態,到報紙要將論調或者議題推返去網上世界。
所以,唔難理解中聯辦點解對網上影響力咁葡萄。以目前澳門傳統媒體普遍寫手嘅水平,相信最多只可做到接近香港 HKG 報嘅水平,即只會製造到一個類似「filter bubble」嘅效果,只吸引到本身親建制嘅受眾。

廣告

澳門非建制、支持民主自由嘅聲音喺傳統電視、報紙媒介已幾乎被消音,真.言論自由空間剩低網上平台。澳門中聯辦高調下令「反攻網絡」,唔可以輕視佢哋有資源非常雄厚嘅優勢,未來真係「樹立」到網民有「愛國愛澳『大局意識』」定係只做到派膠?我就一路食花生,一路觀察。
 

發表意見