立場新聞 Stand News

一隻手指改變宇宙 用你嘅USB 塞住金仔把口

2018/8/27 — 17:59

(圖片來源:Flash Drives for Freedom)

(圖片來源:Flash Drives for Freedom)

呢個年代,咩都上曬雲端,上個世紀嘅 USB 仲有咩用?

說話唔係咁講,呢幾日大家應該都係 Facebook 見到呢張圖,一牆都係金仔,已經夠引起密集恐懼,更加有趣嘅係每一個金仔口都被改裝成 USB 插口。牆上面寫住,只要你每捐一隻 USB,佢哋就會塞啲禁書、禁片落去,再偷運去北韓,用嚟對抗金氏政權巨大嘅文宣武器。

個 concept 當然得意,唔止 visually 已經吸引到人,仲好似好有意思咁改變個世界。側邊嗰個即刻潑冷水:「你真係信有用咩?佢收埋你啲 USB 去賣咋,Kai 子!」

廣告

對世界抱有美好想像嘅我當然條氣唔順啦,我上網一 search 發現呢件事唔係咁簡單,起碼唔係玩膠,而係美國人權基金會嘅 project,叫做「Flash Drives for Freedom」。活動發起人話,北韓嘅黑市好穩固,好有信心喺今年之內收集到 12.5 萬支 USB,再加工偷連入北韓,估計今年內可以接觸到 130 萬北韓人咁話!

(圖片來源:Flash Drives for Freedom)

(圖片來源:Flash Drives for Freedom)

廣告

一場「資訊之戰」如箭在弦咁款!嗰 12.5 萬支 USB 有幾多支入到境呢?諗起都好緊張啊!又有幾多人睇完 USB 入面嘅內容,而改變一路以嚟被灌輸嘅思想?到底咁樣係咪就可以塞住金仔嘅一言堂?鬆動北韓巨大嘅鐵幕呢?諗落好似有啲浪漫,但反正我就信咗喇。你會唔會都想捐一支 USB,試吓一隻手指係咪真係可以改變宇宙?

即使你同我一樣住喺香港,身邊無呢堵「金仔牆」,佢哋都 welcome 你郵寄 USB,或者捐一隻 USB 嘅價錢都得。當買一個希望又何妨?

發表意見