立場新聞 Stand News

乜今年伙炭有開放日咩?

2016/1/20 — 12:07

2016 開放日地圖
(圖:Fotanian 伙炭 facebook)

2016 開放日地圖
(圖:Fotanian 伙炭 facebook)

後知後覺,原來今年有伙炭開放日!可以理解,由於冇贊助商所以冇乜宣傳,又遇上一月多次洗版潮,卑微到冇得再卑微嘅文化藝術節目,當然要被沖到馬桶底下去。

「伙炭有限公司」上年解散,聽說部分原因來自上年開放日改期三月備受的內外批評。我覺得呢個唔係主要嘅原因,只不過係一個華麗解散嘅藉口。最主要嘅原因可能係,大家都做到心灰意冷。搞黎做乜,做咁多野好似冇乜回報冇乜效果。要上位嘅早就上了,成名嘅也就成名了,作品賣得好嘅也就有畫廊代理作品了。呢班人當然唔會再眷戀「伙炭」開放日。另外留底嘅人、新搬入嘅人,當然希望黐住「伙炭」呢個招牌,期待被發拙,期待多D爆光嘅機會。如果唔係抱住呢個希望,邊個會捱一年又一年嘅加租?

今年重回一月,講得好聽D「回歸傳統」,其實就等於自打嘴巴,缺乏自信。我覺得,喺呢張自卑嘅表皮下,其實隱藏咗一種藝術界普遍性嘅自虐式潔癖──藝術不應該向臭錢投懷送抱──與虛偽(在他們嘅心底仍希望自己嘅藝術能夠獲得金錢上嘅成功,受到金主青睞)。

廣告

其實我認為上年伙炭改期三月,的確係一個明智嘅決定。首先一月有太多重要嘅政治議題吸走人們嘅注意力;一月嘅天氣比較凍;大部分人會喺一月忙住策劃自己新一年嘅計劃;一月太多連鎖大商店會大減價,分散人流;一月容易得感冒。

廣告

三月係開花嘅季節,自然係好友齊齊去看展覽嘅好日子。天氣開始暖和,唔洗著到成個糉咁,女仔著得性感D,男仔著得型格D,睇展覽嘅心情又會靚D。三月好多學校考完試,文青們個個出洞要搵文藝節目消遣;當然,三月仲有呃巴嫂,觀眾睇完兩個展覽之後可以互相比較,係學習嘅好機會;而且,好實際,巴嫂將世界各地嘅藝術收藏家、經理人、媒體與藝術愛好者帶到香港,你點知佢地當中會唔會有人對本土嘅藝術生態產生興趣,並決定到伙炭行一圈且睇中你?

其實我也搞唔明白,點解要解散「伙炭有限公司」。係,整船人都攰喇,我明──不過除咗解散,難道就冇更好嘅方案?──例如將個公司「薪伙相傳」給有興趣有能力又有熱情營運落去嘅藝術界同仁?成立一個「董事會」,老鬼擔任董事或顧問,招募有志之士,擔任各職?難道唔係一個好機會培養專業策展人材與藝術管理人材?──當初成立嘅原因係為咗申請政府與其他私營企業嘅贊助,這日後還是有必要的,也是必須的應得的(我地都有份交稅呀,係我地嘅文化權利呀,係屬於發展與普及本土藝術生態嘅公帑呀)。「伙炭」公司營運成功嘅經驗與履歷極為寶貴。對圈外人,它是信用與信譽,是日後申請贊助最好的成績表;對圈內人,它是經驗與知識的累積。解散了,就等於撕毀了呢張成績表。苦苦努力植下嘅樹木被連根拔起,後來嘅人又要重頭再播種。繁盛的生態遙遙無期。薪「伙」相傳?

一句「老鬼參與仲阻住,讓新思維發揮啦」,聽起來大方又開明。但我怎麼感覺缺乏些少責任感?其實新思維並不怕老鬼阻住,因為新思維更需要老鬼嘅舊經驗與知識,才能企得更穩走得更遠,發揮得更出色。問題是,上了岸或退下前線嘅老鬼們願意袋自己嘅錢──例如經驗、學識、資源或人脈網絡──落新思維們嘅袋嗎?

我看著參與藝術家嘅名單,找唔到多少個熟悉嘅名字。那些成名的、知名的、有作為的大多數藝術家,早已脫離了「伙炭」嘅行列,甚至恥於被歸類為伙炭之列。曾經嘅「炭」早已成為了鑽石,高貴嘅鑽石點會願意同廉價嘅炭同場展出?於是能走嘅早走咗,未走嘅閉上大門,劃清界線,閒人免進,祝你薪「伙」相傳。

 

原刊於作者Facebook專頁 https://www.facebook.com/justinchowmanhing

發表意見