立場新聞 Stand News

做藝術家的首要條件﹕政治正確

2018/10/4 — 10:32

my little airport 演唱會,朋友嘈交,面紅耳赤。

A 君話「你說之後會找我」條題本身已經好 feel,聽埋演出,仲正,出自 Nicole 手筆的〈心〉尤其好聽。

B 話,好聽?你唔好唔記得林阿 P 講「我覺得全部女人都係臭西」。咁嘅人做音樂,一定唔係好音樂;更何況,你捧佢,即係鼓勵佢繼續叫女人臭西。

廣告

我想起傅雷家書金句﹕第一做人,第二做藝術家,第三做音樂家。現代香港可謂這句話的極端化體現﹕「你的人品如何,藝術也必如何。」而人品同藝術中間到底有乜關係?無人答到我。更加慘嘅係調返轉,有人話﹕「你藝術咁好,份人一定好好」。荒謬嗎?所以我從來不明白為甚麼劉德華演戲可以演到做特首。到佢拍片撐填海,做醜人了,於是一大班人也衝出來說,對佢失望。Hey Mr.,我想問,你的希望係邊度來的?我有個 friend 同我講﹕「以後唔會睇佢啲戲。」這就是現代社會做藝術的命﹕搞展覽?拍電影?寫小說?拎份政綱來睇睇先。

雖然我唔同意填海,亦唔同意全部女人都係臭西,但如果因為你政治上不同意一個藝術家,就將他的作品打入地獄,咁藝術可以收得工。藝術學者 Claire Bishop 講得好,她提到話近年很多「參與式藝術」有宗教化傾向,追求一種 Christian  good soul。其實不止參與式藝術,成個社會的風氣都是這樣。部份左翼就是喜歡將所有問題道德化。於是餐廳好唔好食,唔再係睇味道好唔好,而係食材有機定無機,或者係唔係 fair trade...這見解已經超越邏輯,完全係道德 override 感受。

廣告

鍾意聽 my little airport 咪鍾意聽 my little airport。你可以左手鬧林阿 P,右手繼續聽佢嘅歌。道德可以討論,政治可以討論,但唔該你同藝術分返開個關係,OK?

發表意見