立場新聞 Stand News

《十三點》?時裝泥㗎?

2015/1/9 — 17:34

《十三點》呢啲唔係老母年代嘅文化遺產嘅咩?點解會有後生仔女有興趣去睇,側邊果個明明九十後,偏偏話李惠珍畫啲女仔好 fashion。Fashion?怪知唔得平日佢著啲衫……唉,當我冇講過。返正題,今次個展係「動漫基地」做,三層都係《十三點》。有公仔書睇,又有時裝公仔,當然唔少得係畫作啦。

側邊果個最中意睇啲時裝實體化嘅部分,知專班設計學生同李惠珍 crossover,將漫畫書入面啲衫車出泥,都幾得意,起碼我冇諗過件事可以咁 present。佢話啲衫睇起上都有幾分韓風喎,呃,呢方面見仁見智啦。後尾我見無聊,落左樓下揭下漫畫坐下。啲故仔乜咁㗎?點解十三點有咁多 ball 去?去極都去唔完,老豆做時裝,佢就有著之不盡嘅靚衫。睇到一半,睇唔落去。我冇父幹,冇沒冇時裝,睇呢啲書泥做乜?可能會產生兩個後果:一,為左著靚衫,我下定決心要搵大錢;二,越睇越嬲,覺得自己好下流。一句到尾,物質主義,完。

廣告

「冷靜啲先,夢幻野泥啫,」側邊果個又開始講大道理喇,佢話咪下下都咁掃興啦,漫畫嘅野都係娛樂嘅一種啫,唔洗時時刻刻都咁批判嘅。即係好似你睇《哆啦a夢》,係人都知現實冇可能有隻咁嘅機械貓,但睇下冇妨㗎,更何況佢入面會其他野都值得睇。十三點雖然係有錢女,但佢會鋤強扶弱呀,「輕鬆下啦,香港人。」唉,我心諗,同你解釋都嘥氣,算數!

廣告

我地一齊行去睇番李惠珍啲畫,我先知佢原來《十三點》以外仲有畫咁多野。又做模型,又畫啲好中國風嘅畫,突破我對佢嘅想像!最最估佢唔到嘅,一定係一幅叫做《人生舞台》嘅畫,睇上去嘅感覺好古代宮廷畫 feel,但好人生百態。一邊有人喊住落台,另一邊又有人爭住上去。一道門啲 BB 咩都唔曉咁進場,另一道門啲老人家又依依不捨咁離開。我企係度睇左好耐,側邊果個話:「我一早估到你會中意呢張。」咩呀?咩中意呀?只係發現原來《十三點》以外,李惠珍都有啲好有深度嘅作品啫。係,我認我都係人,人係要面㗎。

發表意見