立場新聞 Stand News

吸引《幸運》的一些法則

2016/9/23 — 15:27

「遺憾」是青春的一個記號,因為遺憾,所以相信自己曾經「青春」。傷口結疤了,碰上了舊事舊物,觸景傷情還隱隱作痛,最終無憾,是樂事?

可有未必,痛楚讓人感覺自己存在的真實,不致於輕飄飄,過著被程式化的樣版生活;但痛不易捱,overload更會致命,故電影裡都會以此引起共鳴,透過故事去消解遺憾,如平衡時空就是近年自我感受良好的手段,其實要踏前一步,有多難?其實真的很難...

廣告

邊緣人+邊緣人=幸運

《幸運是我》(下稱《幸》)算是齣本地奇兵,唔係講警匪,唔係講社會上流有幾豪,唔係講香港舊事舊物賣港情,而是集中講兩個社會基層的相遇,一個是賺極儲極都不能上樓的窮青,叫阿旭(陳家樂 飾)另一個是死左都未必有人知的獨居阿婆芬姨(惠英紅 飾)。阿旭被宣傳定為邊緣青年,邊緣總令人聯想起社團、為非作歹,但戲中阿旭其實不帶絲毫江湖味,你我身邊總會發現有幾個,他們易躁動、沒耐性、不會做蝕底野、對人對世界不信,有點「憤」,由於他們不聽大人世界使喚,就被標籤為「廢」,大人藉此抬高自己,進一步打壓他們,「邊緣」本義就是不為社會主流所接納,而可怕的是,大人世界似乎愈來愈不明白年輕人,無法溝通,被形容為「廢」、「憤」的年輕人愈來愈多,原本處邊緣,在數目上已可成為一個族群,但這個族群裡其實一個又一個的荒島。

廣告

幸運如何被創造?

我很喜歡阿旭這個人物,片初,你會很討厭他,慢慢你會發覺其實他很貼地,誰不想做模範青年,只是能濕滑的泥土上爬起,講就很容易,「怎樣構思這個人物?」我問導演羅耀輝,「是他自己來的。」坐在導演旁邊的陳家樂笑著道,導演笑著,沒有很正面回應,這是羅耀輝第一齣電影長片,入戲行從事編劇多年,「為何突然想當導演?」我續問,「當編劇其實很被動,要等人家找你,與其等待,不如自己編一個劇本,尋找投資者。」這是《幸運是我》誕生的原因,羅耀輝答得很踏實,沒有刻意為創作意念說一番大道理。

圖片來源:幸運是我 facebook

圖片來源:幸運是我 facebook

加入認知障礙是劇情需要

除了「廢青」,社會邊緣人還有「老友記」,一老一少配搭有一定化學反應,而「老友記」有很多類型,羅導為「老友記」主角植入了認知障礙症,我問他是否特別關注這個群體,他回答不算是(頗誠實),「加入認知障礙是寫劇本考慮,會令一老一少嘅關係更有戲味。」編劇型嘅導演這樣想很純粹,始終商業電影唔係教育電視或者公益片,不一定要擔起道德、社關責任,而植入偉大無倫嘅意義係市場、宣傳部同事嘅份內事、發揮位,誰來演是投資者的關注點,因認知障礙亦不是新點子(遠在92年的港片《黑玫瑰對黑玫瑰》已用嚟搞笑一番),角色芬姨至終落了在惠英紅身上,她近年戲勢旺,加入戲組肯定幫到套戲。

坐埋一條船,就要有計傾

紅姐肯接,相信係因為老友記角色擔正機會不多,而葉德嫻的《桃姐》都是幾年前嘅事,加上佢本身好明件事,紅姐阿媽係病患者,新導演遇上資深演員,好處係無需教戲,演員分分鐘加野,幫到手,但同時又要識得揀、識得推,被演員lead 番感覺唔係太良好,始終導演個名係應該direct 住成件事;紅姐性格直腸直肚,有意見幫到套片就一定講,「芬姨咁嘅年紀係要加番個肚腩先似。」紅姐同羅導提議,他起初不太接受,怕效果不好,可能跟自己的芬姨版不同,紅姐堅持,因為之前同阿媽一齊住,對老友記嘅體型變化很了解,結果芬姨有了肚腩,「你因為夠slim ,出嚟效果就冇乜問題。」羅導跟紅姐達成了共識,不同崗位、年齡,要坐埋一條船,就要有計傾。

《幸運是我》導演羅耀輝(左)、惠英紅、陳家樂。

《幸運是我》導演羅耀輝(左)、惠英紅、陳家樂。

幸運兒—守到最後的一位

我見到紅姐,很自然就會講邊場戲好睇?我話屋企開雪櫃爆喊個場,紅姐即時同導演講起剪接位,唔係好ok 點解要將段戲剪開,令戲氛斷開左,導演聽了,也沒太大嘅反應,紅姐也明白,剪接守尾門都是導演,崗位set 好了,不同意,講左就要順服,這樣的訪問感覺幾真,有個句講個句,坐在身邊的家樂也笑笑口,他比鏡頭前令仔好多,以外型應該紅了,如果陳偉霆都得左,世事就係咁,演員都要守,守起碼有機會,紅姐係成功例子,也是幸運兒,我希望幸運都去到陳家樂。

人品、態度,吸引幸運降臨

陳家樂肯搏,我係去年《破風》就聽聞,斷骨仍然堅持拍戲。如果唔搏,機會係少咗。講真,《幸運是我》佢做得好唔錯,特別係爆喊位、抑鬱位,佢要多謝紅姐教路,紅姐表示唔係人人都教,意思好清楚,問家樂仔,套片阿旭因為遇上芬姨改了運,現實裡誰是你的芬姨?「麥曦茵,我每次有人問,我都會答多謝佢,喺《Viva 華麗天后》,佢力排眾議,堅持用我。」說著眼裡就流露了感恩之情,出身唔係正室唔緊要,一個人有咁多人錫,簡單嚟講解釋可能係有運,不過我相信經營人品、態度會建立一條好嘅跑道,吸引幸運降臨。

《幸運是我》由陳家樂與惠英紅主演

《幸運是我》由陳家樂與惠英紅主演

發表意見