立場新聞 Stand News

「大黃鴨」又嚟喇!今次唔玩膠,玩陶瓷!?

2018/5/28 — 16:30

Florentijn Hofman 《玩遊世界》

Florentijn Hofman 《玩遊世界》

想當年,「大黃鴨」泊喺海港城對出嘅海運碼頭,吸引成千上萬嘅香港人,蜂湧而至,爭住同巨鴨合照!嗰陣時,我同側邊嗰個都迫過,見到咁大隻膠鴨泊喺維港,都咪話唔震撼!話時話,「大黃鴨」最近又嚟香港,不過唔係吹氣嗰隻,而係「鴨父」嘅新作--陶瓷黃鴨。

荷蘭藝術家 Florentijn Hofman 上星期匆匆到港,去咗白石畫廊為佢人生中第一個亞洲個展主持開幕。我同側邊嗰個都特登去捧場,諗住一睹「鴨父」風采。一入場,見到又青蛙,又大笨象,而大家最熟悉嘅膠鴨,放咗喺畫廊最篤篤。成個畫廊都有種好歡樂嘅氣氛,好似去咗兒童遊樂場咁。呢啲雕塑睇落去膠感十足,但實情係用陶瓷做,真係估你唔到。

Florentijn Hofman 《玩遊世界》

Florentijn Hofman 《玩遊世界》

廣告

今次個展覽,「鴨父」仲帶咗新搞作嚟--「線條」系列,即係牆上面嗰啲動物形狀。聽講,呢個系列專登揀瀕臨絕種嘅動物嚟做,造型簡單,但好似好有意思咁。不過,我同側邊嗰個都鍾意之前「玩遊世界」嗰個系列多啲,啲動物好得意又盞鬼,好似攤喺門口嘅黃色兔,真係又 relax 又抵死!呢啲動物雕塑同巨鴨一樣,之前都去過世界各地展出,size 係今次陶瓷作品嘅 n 倍大!無錢環遊世界,但可以喺今次個展覽度一次過睇曬都幾滿足。

廣告

Florentijn Hofman 《玩遊世界》

Florentijn Hofman 《玩遊世界》

開幕嗰晚,我哋行行企企咗好耐,唔熟悉呢啲場合,純粹想睇吓今次「鴨父」有咩新搞作。睇睇吓,側邊嗰個話想同「鴨父」影相喎!企喺人哋側面,行來行去咁,竟然「鴨父」突然開口:「Do you want to say hello to me?」嘩!超級 nice,佢唔單只同我哋影相,仲傾咗幾句。佢話,今次難得嚟亞洲做展覽,梗係想接地氣多啲啦。畫廊建議佢可以陶瓷,佢就決定挑戰呢種佢本來唔太熟悉嘅物料。我哋大讚話佢做得好好,睇落個質感完全唔似陶瓷,被佢呃咗。佢笑住話:「我嘅創作向來都唔係你睇到嘅嘢咁簡單啦!哈哈,你摸吓,真係陶瓷嚟㗎!」

「鴨父」真係超親民,可惜佢開完幕拿拿淋又走咗過台灣,有另一個藝術節等住佢去剪綵。但係點都好,佢喺香港個展覽未完㗎!下個月中之前,大家都仲可以去睇吓,今次唔玩膠嘅「大黃鴨」!

最右手邊嗰個就係「鴨父」喇!合照梗係私藏啦!

最右手邊嗰個就係「鴨父」喇!合照梗係私藏啦!

發表意見