立場新聞 Stand News

打低異形,做返自己

2019/6/6 — 22:16

我呢,其實係一個好細膽嘅人,有咩都唔會走到最前,有事又會偷偷地走先。十幾年前走去畫政治漫畫並唔符合我嘅性格。但唔知點解又可以畫咗咁耐,其實當中有一個好重要好重要嘅原因,就係我知道我係喺一個好自由好安全嘅地方。咁多年我從無擔心過個人安全,無擔心過會唔會影響份工,從來都無。所以一直畫得好Happy。但我知道宜家嘅香港已經唔同咗。就算可能無事,你都會擔心,會驚有事,呢種恐懼係無得返轉頭。

我唔鍾意非黑即白,我亦知道呢個世界上仲有好多個好人,甚至可能包括啲官,包括啲建制派,佢哋可能以為自己幫緊個社會,但同時佢哋又知道自己做緊壞事,佢哋可能仲有良知,又或者知道現實無得改變,所以佢哋可能好辛苦,唔能夠做自己,就好似畀異形入咗落個肚,但又未死得咁。(好彩有人仔補償)

六四時聽返譚詠麟首你知我知,無錯,其情形拉拉拉拉拉,隻異形喺我哋個肚度,你知我知,大家understood,唔好攪佢。邊啲嘢講得邊啲唔講得,心照啦。

廣告

點解要咁?世界唔應該係咁,做人唔應該係咁。要做返自己,唔要再講你知我知,就要打低呢啲異形,打低呢啲恐懼。6月9日遊行未必係最重要嘅事,但要話畀班異形聽,我哋要過我哋想過嘅生活,我哋要做返自己。

PS: 呢批畫好似醜化緊佢哋咁,但我想講其實我唔係要侮辱佢哋,我只係將佢哋宜家嘅精神面貌畫返出嚟。畀異形佔領咗,畀中共封殺咗良知。佢哋其實好慘!

廣告

(文本無題,題為編輯所擬)

發表意見