立場新聞 Stand News

有人說塗污紙幣是犯法,但奈良美智張100蚊紙賣了45萬⋯

2019/10/10 — 15:11

「奈良美智100蚊紙塗鴉,蘇富比拍賣45萬成交。」有新聞咁樣寫

蘇富比秋季拍賣會剛剛完,今年最多人討論應該就係奈良美智這張「紅衫魚」。明明就係一張 100 蚊紙呀,奈良美智畫咗佢最 iconic 的邪惡女孩, 咁就升價唔止十倍,而係 4500 倍!藝術嘅嘢識條鐵,奈良美智識佢老鼠,收到呢張 100 蚊唔小心拎咗去增值八達通,就真係唔好喊,多謝盛惠 45 萬~

廣告

好似有些傳媒咁講,藝術家有光環,就是有這種「點石成金」的超能力。成百年前,Duchamp 簽個名之後,就尿兜都係藝術品。奈良美智今時今日在銀紙上面畫些東西,好自然都係 art 啦?

不過小妹唔明,唔明的是塗污紙幣唔係犯法嘅咩?

廣告

上個月,有網民發起在鈔票上面寫口號,藉以傳播「光復香港,時代革命」的信息。發起的人真聰明啊!銀紙有邊個唔愛?個個都駛,駛來駛去,傳來傳去,個 organic reach 分分鐘高過《立場新聞》的 post!金管局即刻話,紙幣如果被塗污了,市民可以去發鈔銀行要求換張新的。這都算是很溫和了。《大公報》甚至跑出來警告,塗污鈔票是「刑事毀壞」,還說「最高可被判監禁十年」!

那麼,我想問問這張以 45 萬成交的 100 蚊,是不是奈良美智「違法的證物」呢?以前,我一直覺得奈良美智成日重覆自己好 iconic 的作品,copy and paste。今次,他這張 100 蚊叫我另眼相看,他竟然冒住犯法的風險繼續創作。好勇敢,我好欣賞。唔知幾十或者幾百年後,寫住「光復香港,時代革命」的銀紙,會唔會被當成古董咁被人拍賣呢?如果會,唔知又會值幾多錢呢?距離這一天,我們尚有多遠呢?

 

 

發表意見