立場新聞 Stand News

楊學德,小包圍,大賣場

2017/10/14 — 21:52

楊學德畫展「小包圍」

楊學德畫展「小包圍」

睇完楊學德喺海港城個展,側邊嗰個知道楊學德最近又有展,一早就嗌話去睇。今日,終於都去咗睇。工廈入面嘅 gallery,空間都幾大,而且好鬼多畫,簡直係要迫到出門口。一個大廳,仲有一個小偏廳。不特止貼滿牆,仲有唔同嘅玻璃櫃。花多眼亂。

側邊嗰個睇得好開心,張張畫都睇好耐,好多張都話好得意。見到豬肉榮,又話諗起細個同伯母去買餸啦;見到張乒乓波枱,又話記得以前住嘅屋邨,樓下都有一張,同細佬老豆會去打......明明年紀同人差十幾廿年,但樣樣都話有回憶咁,楊學德真係犀利!

廣告

佢話佢最中意最埋邊嗰三張好 childish 嘅畫。楊學德畫得幾靚,唔駛講有眼都睇到,但佢學返小朋友咁畫畫,就認真少見,睇得佢好過癮咁話。佢咁講,我咁聽,但我留意到係呢三張畫右面,有張價單。呢樣仲少見!中上環啲 gallery 都未必會咁 open 標曬價,通常都要啲人問,佢先靜靜雞拎張價單出嚟。好似今次楊學德咁明碼實價,確係好坦蕩蕩!

廣告

睇過先,又真係唔貴,認真是 affordable 過去 Affordable Art Fair!幾千蚊都有,貴嘅都係幾萬,定價同嗰次海港城差唔多。收藏藝術不是夢,就係呢種!嘩,我都可以買張楊學德返屋企掛,唔好話一轉手賺幾十倍,但起碼都覺得藝術可以好貼地,唔一定要鄭志剛先玩得起。如果我同我側邊嗰個有自己地方,我都想買張放屋企。

立場早排做咪有個專題,有個受訪者講得啱:「香港好奇怪,一見到藝文空間賣嘢就係死罪。其實一定要有 sustainable 嘅方法,先係健康。」

今次個展夠曬聰明,幾百張畫仲話「小包圍」,明分就是「大包圍」,咁多張畫,無奶油無一張你鍾意嘅!香港回憶又有,少少鹹多多脆又有,睇返價單上嘅紅點都幾多呀,應該都賣得唔錯。係賣場啊,又點先?明買明賣有咩錯先?佢咁公開張價單,擺明到話你知,我就係買嘢!有乜問題?藝術家有錢生活到,你又可以帶藝術回家,一舉兩得,perfect池!我好希望楊學德今次唔好咁快賣曬啲畫,等埋我有自己屋企之後,可以買幅氹下側邊嗰個啦!

發表意見