立場新聞 Stand News

演「另類一代宗師」艷蘭姐 — 專訪何超儀

2016/4/26 — 13:24

何超儀(作者攝)

何超儀(作者攝)

記得第一次見何超儀(Josie)係電影《戰鼓》專訪,佢飾演嘅係一位斯文獸醫,發揮機會唔算多。當演員,發展係被動嘅,而時間又唔等人,何超嘅其一項優勢,就係有豐厚條件成為電影出品人,開出一條啱自己嘅戲路,事實說明了這是smart choice,《維多利亞1 號》除了拎獎,就見到「不一樣」嘅何超。

眼睛彷彿懂說話

廣告

其實佢個型格,確實係香港圈入面冇乜人可以代替,有啲神秘、睇唔透佢可以又幾「爆」、之後佢繼續出片,舊年差唔多呢個時候,就係電影《全力扣殺》上映。題材今次唔係地產項目,但同樣冷門:羽毛球。

郭子健、黃智亨做導演,拍出嚟已經好熱血,亮點固然係阿驄(林敏驄),而佢飾演嘅係頹廢已久嘅運動員吳久秀,過左一年後,仍然記得戲裡球網前佢對眼,好煞,眼睛彷彿在說話。

廣告

新作模擬射乒乓波和放金魚

今次見佢係因為宣傳電影《無限春光 27》(下稱《無》),係新加坡導演邱金海作品,全片分六個故事,都係喺酒店裡的27 號房發生,故事代表著新加坡嘅不同時段。

何超喺第二個故事現身,叫艷蘭姐,「最特別係我要做導師,教一班舞小姐點樣發揮pussy power。」何超講起也不禁微笑起來。笑,唔係因為題材較為erotic,事實上佢都有份參演前年話題作品《豪情 3D 版》,予人印象都係前衛女性。笑,係因為覺得角色真係有趣。

艷蘭姐唔係虛構,實乃參考一位馬來西亞人——陳惠珍,「我覺得佢(指陳惠珍)好犀利,好有創意,點會可以諗到用私處射乒乓波同放金魚。」,我睇咗電影,都覺得以當時而言,真係好勁,而陳惠珍當年亦憑此絕技走紅,亦有培訓「學員」,「真係可以話,係呢個領域嘅一代宗師!」我不禁道。

何超大表認同,「冇錯,係一代宗師!」

演另類一代宗師

大家不禁大笑。亦係整個訪問裡較面,少出現嘅場面,何超全程都是較為cool,每條問題都係想了一陣子才回答,有時不免會有dead air 場面。但唔好誤會,相信唔係因為佢傲慢,因為見到佢對眼,令我感覺唔係囉,佢係有嗰句講嗰句嗰種,佢唔會無端端同你示好,然後吹水一番搏好感。

睇完戲,亦覺得佢係有演戲天分(因為好多演員做得好,只不過係做番佢自己),喺《無》裡的艷蘭姐,比平時嘅何超聲音高了半度,提高咗嗓子,仲滿有信心去展示佢嘅pussy power,跟佢之前較沉著的角色明顯不同,戲份不多但有新突破,我想渴望突破都係何超嘅特色。

歸唔到類嘅演員

「你最深刻係邊一part嘅故事?」我問,「梗係我自己個part。」何超答。

「除此呢?」我續問,「係韓國個篇。」我狐疑「點解呢?」

佢諗咗一諗,「因為佢哋(男女主角)唔知點解會,搞埋咗一齊。」佢繼續答,佢哋點解會搞埋一齊?的確係有點出奇,一對男女去旅行,又唔係男女朋友,卻又唔只係純屬好友,好有嫌疑,關係喺灰色區域遊走。

而世事的確是如此,並非非黑即白,有啲嘢很難弄清,有啲演員都係,歸唔到類,呢樣,倒係生活入面,更貼地嘅描寫。

發表意見