立場新聞 Stand News

給芷晴同學嘅信:考試本身就係權力崇拜

2015/11/17 — 10:25

是咁的,最近 DSE VA 單嘢,因為考評局出咗份 2016 年考生指引,又搞返燢件事。我無讀過 VA,但考過文學,都係有賞析有創作嘅科,想用自己嘅經歷,以過來人身份同同學仔分享吓咁。

想當年,都成十年前,嗰時仲係考高考嘅年代,我讀文學,由中四讀到中七,大大話話都有成四年時間。當年都已經有 SBA(編按:校本評核),但好似佔分唔高,廿零三十個 percent 咁。記得我係學校成績唔錯,校內攞學科獎,校外都攞過文學獎,以 SBA 嘅成績推斷,老師同學都諗住我坐 B 望 A。我都好有信心咁,諗住去到試場,要做返平日嘅水準出嚟。考完個感覺係,應該同平日差唔多,但結果出嚟嘅成績只有個 D!

我好記得放榜嗰日,老師行埋嚟第一句唔係安慰我,而係怪責我,問「點解會咁㗎?」老師唔覺得考評局有錯,而係覺得我做得唔夠好,問題一定係出係學生度。老師又話:「都夠分入到大學就唔好搞咁多嘢」,就咩都無再搞,連 appeal 都無申請。

廣告

今日見到芷晴老師咁仆心仆命幫佢討回公道,我好痛恨當日我無一個咁撐自己嘅老師。我當時選擇咗一條,同芷晴其他被捉嘅同學嘅路──唔再掂文學相關嘅嘢,我憎死文學!直到今日,我大學都畢埋業,做嘅嘢同文學一啲關係都無,但咁多年嚟我都會睇文學嘅書,同樣我亦開始明白當日我老師嘅講法。

所謂每個遊戲都有佢嘅遊戲規則,而考試,考嘅根本唔係創意,而係你有幾聽話。你問心,由幼稚園到中學,所有考試有邊個唔係有 model answer 㗎?大家讀嘅又係啲,從名家文章,到大師理論,個個都係啲有頭有面講嘅嘢,有幾可會提到阿某阿壽講嘅嘢?好似歷史科咁,你有再好嘅分析力,都唔該,請你背返十個八個引文先。你篇文唔單止要言之成理,仲要有專家加持,唔係你都上唔到上品。

廣告

讀咗十幾廿年書,做咗將近十年嘢,宜家睇返公開試,我唔會話係過眼雲煙,因為真係影響咗我之後行咩路,但講白啲,考試咪一場權力崇拜囉。首先係考評局本身係一個權力機制,佢已經定咗個遊戲點玩,所有參加者都要跟住去。而佢考核嘅內容,都係關注啲有權力嘅人講過啲乜嘢,所以亦都可以理解,點解芷晴同學「參考自己」唔可以,但其他考生「抄畢加索」就攞 A,又或者抄考評局嘅「參考資料」都無問題。因為佢哋有嘅係權力,我哋無名無姓就無參考價值。

用咗十幾年時間,我總算睇明白咗,呢個世界就係咁玩,好無奈,有啲人好惡,但無論考試成績改唔改到都好,希望芷晴同學對於創作嘅熱誠都可以堅持落去。考試又算啲咩喎,我今日都係咁生存緊,平日睇吓書都幾開心丫,想畫畫咪畫囉,考評局又阻唔到你嘅,係咪?

發表意見