立場新聞 Stand News

藝術玩咁大?前裁判官主持《K歌法庭》

2018/8/16 — 16:59

早幾日寫完個嗌交工作坊,就有朋友 send 個 facebook invitation 嚟,話仲嗌乜交,而家興去《K歌法庭》,有咩不滿就唱出嚟㗎。佢仲話,個 show 下星期三就嚟香港,叫我要去睇吓喎。但我一聽個名,心諗:撞鬼啊你!藝術家無嘢玩,玩法庭?!

咁我 search 吓呢個《K歌法庭》到底搞邊科啦,見到有條片,係去年個 artist 喺北京尤倫斯當代藝術中心做嘅同名活動,其實都無乜咩特別,就大家輪住出嚟唱吓歌仔咁。個 artist 話,單嘢個 concept 係嚟自紐特人同愛斯基摩人嘅「歌唱決鬥」傳統,佢哋會好似唱山歌咁,唱歌嚟讚吓自己,或者笑鳩人哋。(聽落都幾無聊。)但阿 Jack 就深受啟發,攞咗「高歌解冤仇」嘅 idea 創作咗《K歌法庭》。

廣告

K歌法庭 Karaoke Court from Miss Ruthless on Vimeo.

《K歌法庭》個玩法係咁嘅,主辦方會事先招募「訴訟當事人」,到時以歌 battle 咁;而含蓄少少嘅人,亦都可以報名做「陪審團」,參與投票,決定鬥歌比賽邊個贏。根據個朋友話,嚟緊香港個 show 係慶祝高檔食府 Duddle's 嘅慶祝活動,到時會有美酒佳餚,保證「氣氛歡樂」,仲話搵咗前香港裁判官黃汝榮嚟做主持添。認真到一個點!

廣告

嗱,no offense,我覺得法庭唔係唔可以挑戰,唔係唔可以用嚟做創作嘅。阿 Jack 應該都係一片好心,覺得相嗌就唔好口,有咩唔開心咪唱出嚟囉,唔駛嗌交嘅!我明白,好欣賞;但關公係咪可以敏感多少少呢?呢幾年香港咩環境大家好清楚,幾多後生出出入入法庭,甚至監獄。法庭新聞不時做頭條,條條新鮮鑊鑊金。我諗提起法庭,今時今日嘅香港人應該十個九個都笑唔出。呢個時候做個法庭 form 嘅 show 嚟香港,係咪 best timing 呢?我成日覺得做 artist 可以 innocent,尤其外國 artist,佢可以大條道理唔知香港咩環境;但搞活動嗰個就唔同,佢做邀請人嗰個,應該一眼關七,foresee 曬所有可能爆發嘅伏。

伏還伏,都係我覺得 bad feeling 啫。呢幾年日日都大魚大肉嘅,大有人在。《K歌法庭》又算得係咩喎?

發表意見