立場新聞 Stand News

【藝民節】藝遊長洲?連本島人都未知咩事喎

2015/12/10 — 16:24

見無雨,星期日同側邊嗰個入咗長洲,聽講有咩藝遊活動,有地圖,睇長洲有咩藝術搞。見天陰陰,應該無乜人同我哋迫船,一於入去睇下。

我同側邊嗰個好耐無去長洲,對上嗰次好似係接一個外國朋友,去睇太平清醮,人山人海到一個點。今次船都唔多人,好多應該係居民,可能星期日,大家都諗住第日要返工,星期日下晝就唔入離島啩?

埋岸,其實都無乜邊個搵咩藝術嘢。按照踟躕私房嘅指示,落船之後向左行,一分鐘就見尼泊爾餐廳攞地圖。行咗超過一分鐘,但都搵唔到,又行去另一邊睇睇,見到有活力長洲嘅導賞中心,諗住佢哋係合作機構,應該有啲 hints 啦,sorry,成個 booth 咩都無,地圖又無。咁我哋咪問吓,前面買海味嘅阿姨。

廣告

「知唔知今日有藝術活動呀?」
「咩嘢藝術呀?」
「活動呢,有地圖攞㗎。」
「無聽過喎。」

成間舖嘅人無聽過,叫我搵第個問。我哋再行入啲,見到有間貌似好文青嘅舖頭,入去行個圈,啲 product 都幾趣怪嘅。買完嘢,順便問下兩個靚女老闆娘,知唔知啲地圖邊樹有得攞。

廣告

「喔,我哋無參加喎,但地圖應該係碼頭附近有得攞。」

我知,咁我哋又行返轉頭,終於見到間舖門口貼咗踟躕私房嘅 poster,仲唔係你?我問老闆,有咩玩,老闆終於俾咗張地圖,仲叫我哋可以按住地圖搵曬咁多個地方出嚟,儲印仔玩遊戲。

「儲完有咩用㗎?」
「咁我就唔知啦,你要問返主辦方喎。」

吓?你叫參加嘅舖頭喇喎,儲印仔做乜你都唔知?!超失望,不過是但啦,有地圖係手總好過無,我同側邊嗰個沿住條路,再睇吓有咩特別嘢咁。行行下,側邊嗰個又嗌攰,求其搵咗間茶餐廳坐吓飲吓嘢,順便攤大張地圖,plan 吓有邊度好去。一舉起張地圖,大家啲眼神就好奇怪,以為係咪攤得太大啦,摺細大家都仲係眼望望咁。食客個個都係講返,琴晚阿仔好曳激死我之類嘅話題。藝遊唔藝遊,好似完全唔關佢事咁,更加唔駛諗有無人主動問你:喂,要唔要介紹返?

叉完電又可以行多陣,見到餅舖隔籬有個 space,開住門,入面咩都無,只係四堵牆,有啲報紙有啲筆。重點係──無人。佢出面貼咗 poster,寫住「寫字樓」,但我見啲人行過都只係望吓望吓咁。唔肯定係咪入得去,側邊嗰個走去問餅舖靚姐。

「隔籬咩嚟㗎?」
「好似有個外國人,藝術家喎。」
「哦?咁佢搞緊啲乜?入唔入得去㗎?」
「唔知喎,開咗門應該得啩。」

靚姐都係完全唔知咩藝遊咩活動,好似只係有地圖,有啲人攞住啲地圖四維貢,但唔多囉,而且好多都係外國人。活動雖然第一次搞,又無打算要長期做,但都唔係咁慳水慳力啩?無錢啫,有心都仲有好多嘢可以做㗎,起碼我覺得俾多啲島上面嘅人知道咩事,成件事個氣氛會好啲囉。宜家,我同側邊嗰個以為好大件事,點解原來去到先發現個活動咁唔起眼。大家又唔知咩藝遊咩地圖,好像好 cool 咁。我哋諗,其實佢哋有無通知啲居民㗎?點解唔可以俾佢哋知多啲,可以一齊玩呢?

美國華盛頓大學有個教授阿 Justin Jesty 曾經講過,話呢啲藝術節對鄉鎮係好事,因為大家有個角色設定。居民做主,觀眾做客,大家嘅對話就好容易展開。今次睇長洲個 case,首先長洲就唔係一個無人去嘅荒島,唔駛靠搞藝術,都已經有好多人流,只不過佢哋嚟消費,無乜交流;但宜家睇嚟,啲居民又唔知咩事,即使有主客嘅 setting,大家都傾唔到啲咩。係因為個活動第一年搞未有氣氛丫,定係根本搞手無諗過要真係同居民好好溝通呢?

發表意見