立場新聞 Stand News

《逆流大叔》絕非過譽

2018/8/18 — 10:36

《逆流大叔》劇照

《逆流大叔》劇照

《逆流大叔》好好睇:很久沒有看過好看的電影,而且是港產片,《逆流大叔》就是好好看,一致好評絕非過譽。

有笑,有淚,有熱血,有溫情,有哲理,有批判,本土,貼地,寫實,將呢啲元素共冶一爐而唔扮嘢嘅小品,加上一班好演員,有青春,仲有佬嘅回春,真係好耐冇試過睇港產片睇得咁開心又咁回味。

進入第三周,雖然是細院,但今晚幾乎全院滿座,口碑不脛而走,大家自然識貨入場支持,叫人高興。

廣告

新進導演陳詠燊,在電影界就肯定不新。《逆流大叔》上之前大半年有多,佢逢星期四喺《蘋果》寫「辦公室政治學」,睇了兩期就覺得有料到,當中講嘅管理經驗和辦公室人生百態非常到肉,於是個個星期睇,有啲仲 keep 起咗。估唔到佢嗰時就係拍緊呢套戲,唔怪得個故仔講啲辦公室嘢咁鬼正。

早排余香凝因感情事上晒新聞,其實我唔知道佢係邊個,但我知網友睇完《逆流大叔》都大讚佢靚女。初頭一睇,我以為係陳嘉桓。咁我睇完,明晒,套戲將余香凝拍得好陽光好靚,唔怪得令人留下深刻印象。有咁嘅教練,真係大叔都練龍舟。

廣告

(呢段微微劇透)同行的人問:點解佢哋最後穿「英雄本色」。我呢啲真大叔,睇《英雄本色》唔係睇經典台重播,係跟家姐喺樂聲戲院入場坐半個位睇嘅(今日後生唔知係咩了),呢套戲我睇咗十幾廿次,裏面有一句永遠精彩嘅對白,就係 Mark 哥同豪哥講:

「(我咁樣做)唔係要證明我威,係要話畀人聽,我唔見咗嘅嘢我自己攞返!」

戲中各大叔唔見咗乜嘢?唔見咗樽鹽呀!

未睇快啲睇,重溫睇港產片的愉快情懷。

 

(標題為編輯所擬,原刊於作者 Facebook

發表意見