立場新聞 Stand News

8種藝術大盜失敗原因

2017/2/21 — 16:22

【藝術號外】 我地耐唔耐係媒體會見到某美術館名畫被盜嘅消息,但係有人成功一定都有人失敗,睇番轉頭佢地失敗嘅原因又幾騎呢喎。我地一齊黎研究一下佢地失敗嘅原因:

▲ 達利送俾Rikers Island監獄嘅畫

▲ 達利送俾Rikers Island監獄嘅畫

廣告

代替品太Hae

達利係1965年送咗幅素描俾Rikers Island監獄,因為佢應承咗但無去到同囚犯做workshop,幅素描就一直掛係監獄度。直到2003年,四個獄卒決定一個偷龍轉鳳大行動,偷咗幅達利真跡,換幅假嘅上去諗住神不知鬼不覺啦。四條友準備係早上八點交更時整響個消防鐘,等其他獄卒走去救火,等佢地知道係誤嗚時佢地已經換咗幅畫返屋企,結果亦證明佢地個計劃好成功,名畫到手,但係佢地原本近乎完整嘅計劃最後功虧一簣,原因係乜?

廣告

問題出係佢地換上去幅假畫度,首先幅畫畫到小學生畫咁,係人都睇得出唔係出自大師之手。跟住係幅畫嘅大細,佢地幅假嘢明顯比真嘢細咗一圈,驚死人唔知係假嘢咁。最Hae係真嘢係用靚靚畫框框住,佢地攞走幅真畫,竟然係咁易將幅無框嘅假畫用釘書機釘係牆上算數。佢地明顯當其他同事係盲既,但係我諗盲既都知道幅畫係假駕啦,結果即日被人拉哂。

信錯人

英國有一班專偷畫嘅犯罪集團,佢地成日計劃去偷藝術品,但係每次都外判偷嘢嘅工作,佢地唔知係咪貪平每次都請啲流爆嘅人。有一次啲賊偷咗舊雕塑,係條街到俾人追,但係個賊無諗過原來舊雕塑咁重,結果唯有留係街邊自己走佬算數。另一次佢地又請咗另一班賊,班賊已經成功偷咗啲藝術品重收埋咗係一個秘密地點添,可惜班賊之後唔記得收咗係邊,最後連警察揾到佢地都未揾到,藝術品又安全啦。

塞車

有一班賊準備打刧美術館,佢地偷咗工作人員嘅制服同一架速遞公司嘅Van仔,計劃好扮遞公司入去縛起保安同其他工作人員。佢地帶齊工具準備食大茶飯,點知去嗰陣事遇著塞車,等佢地去到美術館門口時發現美術館已經過咗辦工時間關咗門,入唔到去唯有放棄⋯

▲ Carl Larsson嘅畫

▲ Carl Larsson嘅畫

架車唔夠大

2012年,瑞典有兩個賊偷咗兩幅Carl Larsson嘅畫,點知去到架車時先知架車唔夠大裝唔入。結果唯有掉係地度自己走人要緊,走時重爭啲車過兩幅畫添,好彩最後無事。另外係南非有一班賊去美術館偷畫,結果留低價值最貴幅畫係街邊無攞走,因為架車唔夠大。

接贜車放飛機

1991年,兩個持槍大賊走入荷蘭梵高美術館,搶走二十幅幅名畫,但係佢地係接贜地點等咗半個鐘都唔見有人揸車黎接應,嬲起上黎掉哂啲畫係路邊走人算數。

你睇我唔到⋯就假

1911年,一個叫Vincenzo Peruggia嘅人將蒙「羅麗莎的微笑」收埋係大褸裡面,直接由羅浮宮大門走咗。佢嘅行動明顯啟發咗呢位人兄,係2014年,一個男人係英國一間畫廊裡面,想將一幅價值七百磅嘅畫收係外套度但唔成功,試咗好耐都唔得,決定將幅畫夾係隔肋㡳行出畫廊。佢所有行為都俾防盜電視錄低哂,明顯係畫廊門口有班差佬等緊佢。

▲ Banksy係門畫嗰幅畫,拆極都拆唔落黎

▲ Banksy係門畫嗰幅畫,拆極都拆唔落黎

拆唔甩

Banksy嘅作品係街邊,自然有好多人想偷,但係真係咁易?係美國新奧以蘭,有兩個賊扮工人將Banksy就係牆幅畫用木板圍好,話俾街坊聽呢幅畫會拎去倫敦展覽。兩條友日日起勢咁想拆幅牆落黎,結果攪咗幾日都唔掂,引起差人留意之後自己走人,出咗一身汗幅畫無受傷。另外係指2006年又有兩條友扮工人想拆走有Banksy畫嘅門,結果又係攪一輪出一身汗,俾人發現無功而回。

▲ Jewish Museum俾人偷咗Marc Chagall嘅畫

▲ Jewish Museum俾人偷咗Marc Chagall嘅畫

等唔切

係2001年,Jewish Museum俾人偷咗幅Marc Chagall嘅名畫,過幾日美術館收到通知,話偷畫嘅人係個叫International Committee for Art and Peace嘅組織,佢地唔係要錢,佢地要求以色列同巴勒斯坦和解,咁佢地就會歸還幅畫。咁呢啲國際紛爭點會咁易解決?八個月後有人寄番幅畫俾美術館,可能等唔切掛。

想睇更多藝術資訊?Click入去

TumTum.hk 嘅FB
TumTum.hk嘅網站

發表意見