立場新聞 Stand News

【東北十三人獄中口信】「你哋咁都13個月,我哋社團兄弟拖馬打交點算?」

2017/8/30 — 19:00

梁穎禮

梁穎禮

東北告急 無你點得」專頁按:本文為朋友探望「東北十三人」之一的梁穎禮後,帶給大家的口信。

編按:2014年6月13日,政府希望通過新界東北發展計劃前期撥款,13名抗爭者參與集會和行動時被捕,同案被告已完成80至150小時社會服務令。今年,高等法院刑期覆核,8月14日在法庭加處刑期。此案13名被告依次為梁曉暘、黃浩銘、劉國樑、梁穎禮、林朗彥、朱偉聰、何潔泓、周豁然、嚴敏華、招顯聰、郭耀昌、黃根源和陳白山。

「啱啱轉到嚟塘福,竟然俾我撞到之前支援碼頭罷工時認識嘅工友。留守碼頭嗰時,佢就瞓我隔離個營,依家同我同枱食飯。」

「呢個監獄,有一半人係外籍人士,其中一半係非洲、美州,另一半係南亞、巴裔等。同佢哋講足球、傾偈係好開心。啲黑人好大隻,我喺度工作時,佢哋會幫我倒埋水,因為我太細粒。但係獄中既「桂枝仔」一樣會歧視,鬧佢哋係假難民。」

廣告

「第一日嚟到,我都俾人鬧到仆街,問我係咪搞社運。後來發現原來 德昌里2號3號舖有人會寫信俾呢度嘅囚友,例如 Daisy Nks,覺得出面嘅人好忙,都冇時間、冇心機睇信,最有心機睇嘅就係坐監嘅人,所以就會係咁同呢度嘅人講社會議題。佢都有提過有個朋友,即係我,入咗嚟,啲囚友知道,對我都幾友善。感覺好似前人種咗啲嘢,我就可以享受到。」

「其實都有些人點都係憎人搞社運,會覺得,幫村民都係仆街架喇,不過冇佔中咁仆街囉。但係佢哋又會好奇問,東北係咩野、佔中係咩野。然後又會覺得非法集結判得好重,「你哋咁都13個月,我哋社團兄弟拖馬打交點算?」然後叫我哋一定要上訴,唔好做衰案例。」

廣告

「我掛住大家。」

「我掛住德昌里,掛住Hidden Agenda。想同Hui Chung Wo一齊搞HA。」

「我緊張 大專政改關注組,我喺電視見到刑事藐視法庭案報導,見到關細宏就想喊。同埋 Lester Shum,叫佢加油呀。大家呢段時間有人關注,可以出嚟講多啲自己真心相信嘢真心想講既野就好喇。細宏啦,佢好有型,又低調,但又重要。叫 Chan Man Wai 唔好暴飲暴食啦,身體好重要。」

「噚日見咗爸爸媽媽,已經喊咗。其實之前,一年只係見佢地幾次。」

「我記得判刑嗰日,見到何潔泓喊,我好有感覺,我想問候孖女 Siu Ming。」

「我都想問候 「土家」故事館  Abraham Lai。你幫我highlight:*係行動者之間嘅問候*。想同佢講,好抱歉,好少時間同佢搞全民退保。吖,不過我有同呢度嘅囚友講全民退保架,佢哋話我哋淨係識反對政府,唔會支持,我話我哋唔係架,我哋係支持全民退保架!」

「我隊Band意色樓 AN ID SIGNAL錄緊第三隻碟,依家要停。唔知會點。」

「我本來無同人講我識玩音樂,因為唔想被人捉去彈Beyond嘅歌。呢度嘅人要坐好耐,佢哋彈Beyond嘅歌嘅造詣,已經超越咗Beyond架喇……唉! 羅冠聰 Nathan Law 囉,佢就走去同人講我識音樂!」

「呢度可以每每星期夾一日band,你叫 Jaco Chow Nok Hang幫我買啲fushion、funk jazz為主既譜,一個月可以入6本書,你叫佢同 Wong Jojo夾啦。」

「 Jaco Chow Nok Hang唔使覺得無佢份坐就唔開心啦,其實我哋依家只係喺唔同崗位。以前我喺 (匯豐版) Occupy Central 佔領中環 ,同佢最近,但我揀咗laid back嘅位置;依家只係分返工,我做串連一定冇佢咁好。叫佢飲少啲可樂、食少啲煙啦,對身體好呀。我都好掛住佢。」

「大家都分開唔同監獄,不過我聽你地講,大家情況都OK,咁就好。」

「東北既村民, 馬寶寶社區農場 Mapopo Community Farm D女仔、男仔,大家都要加油。」

「2010年反高鐵,我有份苦行。今日我想寫篇文,叫做「苦行到這一站」。大家等我寄出來啦。」

******

🐿 📮 寫信給東北十三人 + 公廣三子  📮
詳情:https://goo.gl/G3vPbL

 

原刊於:東北告急,無你點得 Facebook Page

發表意見