立場新聞 Stand News

【多圖回帶】又搞地區特色藝術裝置?怕且又要悲劇重演...

2018/2/28 — 15:47

喺茶餐廳食食吓通粉,聽到波叔話搞咩「旅遊藝術裝置」,啲童年陰影即刻返曬嚟,心諗:唔係啊馬?

今朝波叔講《財政預算案》,佢咁話嘅,話要喺香港主要旅遊點整啲裝置,要「注入設計元素、創科應用和燈光藝術」,仲要「結合地區特色」,話要俾旅客「新體驗」喎。

呢個體驗到底有幾新就未知喇,但舊嘅回憶就一啲都唔好!唔知你有冇印象,深水埗嘅鴨寮街路口嗰塊大大塊嘅電路版,充分反映「香港秋葉園」嘅地區特色,但就算遊客嚟到,最多都係影吓鴨寮街啲排檔,有邊個走去同呢塊巨型電路版影相?唔好玩啦,咁核突!

廣告

深水埗數碼之源,圖片來源:維基百科

深水埗數碼之源,圖片來源:維基百科

廣告

好,波叔今次咁強調「創科應用」同「燈光藝術」丫嘛,同樣都有前車可鑑㗎。觀塘海濱嗰啲疊盒仔嘅雕塑,久唔久仲會有燈光音響噴霧效果咁嘅裝置。本身話就話意念來源自廢紙回收業束起廢紙嘅手法,好似當年觀塘裝卸區咁喎,但呢舊嘢被人踢爆咗抄襲,同德國裝置藝術家 Rebecca Horn 喺巴塞隆拿海灘嘅作品八成相似。

觀塘海濱燈光裝置,圖片來源:維基百科

觀塘海濱燈光裝置,圖片來源:維基百科

呢個十八區地標系列,簡直經典,仲有玉器街嘅「香港大玉石」,跑馬地嘅「蟠龍匯瑞」,同埋深井巨鵝......正所謂「不可一不可再」,呢啲咁有地區特色嘅裝置,擺咗成十年都有,咁耐以嚟都係彈多過讚嘅。波叔你又何苦嚟一轉悲劇重演吧?影響市容啊喂!

香港大玉石

香港大玉石

灣仔「蟠龍匯瑞」

灣仔「蟠龍匯瑞」

圖片來源:長春社

圖片來源:長春社

 

發表意見