立場新聞 Stand News

茶餐廳的魔女宅急便

2016/8/24 — 18:01

畫家慧惠。

畫家慧惠。

【文、圖:朝雲】

慧惠:好彩油麻地仲未俾領展入侵,否則我已經生存唔到。

***

廣告

東涌的逸東街市,自落入領展之手,物價高昂。朱凱迪等嘗自設墟市,迭起抗爭,屢次被捕。惜街市終難逃翻新,成為高檔商場之命運。

弔詭在商場重開,竟以懷舊招徠,模仿各地舊區小巷,卻連虛殼也說不上,只是劣拙的模仿。但在宣傳片下,無數人 tag 人約人,貪靚嘗新,都想結佯同行。

廣告

為何寧要假古董,也不珍惜眼前人?

慧惠 facebook 專頁

***

問:為何喜歡畫畫?

慧惠:自細放學鐘意睇《櫻桃小丸子》、《百變小櫻 Magic 卡》,跟住又迷上《COMIC FANS》等少女漫畫,到樓下文具店買素描本,摹描漫畫的彩頁。上到中學,就與喜歡少女漫畫的同學一起玩同人誌。

中學會考,我學靜物素描。去到理大讀高級文憑課程,學的是設計,遇到小克老師。他會帶學生到舊區畫唐樓,向學生展示十多年來的素描,畫得好靚。

自己沒有讀藝術系,一來屋企人成日話「藝術搵唔到食」,於是嘗試找平衡點,能不能既搵到食又畫到畫?二來曾叩門浸大視藝系,教授問我畢業後想做什麼。也許我年少無知,沒遠大理想,說自己純粹喜歡畫畫,結果沒有獲取錄。

朋友就鼓勵我,說我剪接的技巧不錯,於是入讀城大的創意媒體系,選修電影。

***

問:怪不得你在網頁的宣傳片,拍得那麼漂亮,是你拍的?

慧惠:是 Faat Lau 的作品。佢叫阿發,我們正因電影而相識。

大學畢業後,我做了幾年平面設計師。但為了畫自己喜歡的東西,終於決定豁出嚟。

***

問:是否因為家庭的背景,使你喜歡小店?

慧惠:父母都係海南島出生。爸爸本來是漁民,常常告訴我們,當年越南、菲律賓的海有幾多靚魚。 25 歲他才來港學廚,最初打工,後來接手這間茶餐廳。佢最擅長咖哩,懂得買三十幾種材料,只為熬咖哩膽。咖哩牛坑腩飯,就係我地茶餐廳的招牌菜。

學電影時,譚家明老師教過我們,電影是關於人的故事,好的電影要盛載人的細嫩情感。我畫畫的方向,一樣受他影響,會觀察小店的老闆怎樣工作,怎樣同熟客吹水,認識老闆的性格,有咩值得欣賞學習。

***

問:緣何萌生畫小店的計劃?

慧惠:14 年傘運,佔旺區有一個社區圖書館。傳媒往往只報道重要的政治人物,但運動中絕大部份的人,其實都是小人物,他們都值得記錄。所以我揀小人物來畫。

榮興單車的鍾漢強師傳,見到我係社區圖書館附近畫畫,「不如你嚟畫吓我間舖頭呀。」就在油麻地渡船街,好近屋企。畫畫期間,可以觀察到居民如何生活,好寧靜舒服。

於是我就由自己住嘅地頭開始,畫多啲小店。將畫放上網後,就有更多朋友介紹我畫其他店舖。

畫完榮興單車,現在畫展的展覽場地,銀の文房具的鍾燕齊先生,說他正從事影樓的計劃,推薦我去畫影樓,來日出書就用得著插畫。於是我先後拜訪善美影室和美姿華影室,至今已經畫了超過十間小店。

***

問:畫畫期間有什麼感受?最喜歡哪一間小店?

慧惠:我最喜歡善美影室,因為家庭式嘅經營好溫暖。佢地係團隊工作,除了林國盛老闆,還有他的徒弟石貴南師傅、姐姐和兒子。

林老闆同石師傅同門出生,亦師亦友。林老闆每朝都會游水,佢把學生年代比賽的金牌送給我;仲為我補拍畢業相。「見你咁欣賞我地影樓,不如幫你影輯畢業相」,已經畢業兩年,但當時又真係冇認真影過,咪著返畢業袍補影。

林老闆本來係黑房工作,身處幕後。但上一代老闆退休,承繼店舖後,他唯有轉型到幕前,面對客人。因此他練就好多 gags,令客人笑對鏡頭。佢變左一個口水佬,可以係咁講笑話,令大人小朋友都好開心。

至於石貴南師傅,雖然一樣健談,但佢就覺得同人影相太麻煩,寧願留在黑房。石師傅早晨會係道觀做義工,幫手執藥;下午就做黑房師傅,夜晚就去韓燒店做兼職。夜晚的工作,便由林老闆的兒子義務代勞,有正職的他,放工後還會來影樓幫手執相。

大家真係要幫襯吓。年初業主有意收舖,影樓可能結業,但因為傳媒報道,業主終於肯續租。結業的消息傳出,很多人來念舊,影樓接工作接到手軟,但如今熱潮冷卻,生意額又回到從前,靠老顧客幫襯。

我去畫畫時,林老闆正為一家人影相,原來當年兩公婆就在影樓拍結婚照。

***

問:最喜歡哪一幅作品?

慧惠:就係自己屋企的茶餐廳。畫展即將開幕,男朋友不斷勸我,要畫埋自己屋企舖頭。所以趕工畫好這幅畫(圖二、三),作為報答家人的小小禮物。搵唔到錢嘛,唯有用心機搭救。

大部份小店的作品都係現場畫,但這幅畫牽涉太多人物,尤其是人物的比例要特別小心,所以要在屋企畫。

家人都諸多意見。例如妹妹不斷「據理力爭」,要把她畫進去。她有時也會落場客串,落單時會寫菜式的正寫和全名,遞單時看慣簡寫的水吧會笑她。

因為牽涉很多動作,還要請爸爸媽媽示範怎樣拋鑊、上菜等等。爸一度以為我有心「女承父業」,勸我「你要由基本學起,唔可以一嚟就揸鑊鏟喎」。

知道真相後,爸勉為其難地說「好~喇~」,但到示範的時候,他又開心到四萬咁口,即使鑊裡什麼都沒有,依然好認真地拋鑊。

至於媽媽,就請她示範在茶餐廳咁,一隻手拿三四隻杯碟。她用特別的手勢,好似玩雜耍咁,就能夾著它們,一滴不倒地前行。

***

問:辭工畫畫,有沒有遇到困難和掙扎?

慧惠:今年三月底我辭去工作,而家一星期到店舖兼職幾天。幫吓屋企人手,父母條氣會順好多,否則會俾家姐哦。

始終要消耗自己積蓄,為屋企打工不過燒慢啲啲。希望積蓄燒光之前,插畫的事業能夠支撐我生活。

***

問:好奇一問,為屋企打工會不會覺得尷尬?父母給你多少時薪?

慧惠:我做侍應,收銀聽電話落外賣等等。由中學起已經間中幫手,所以唔覺得尷尬,由細到大都鍾意睇大叔點坐,佢地鍾意戙起隻腳睇電視嘛,好舒服咁嘅樣。

至於人工就比最低工薪高啲,算係咁喇~

***

問:有沒有留意到東涌逸東街市,復業後成為高檔商場,卻以懷舊來包裝?

慧惠:我未去過,剩係睇過啲相,裝修到好似 City'super 咁樣,我地呢啲草根,未必負荷到。好彩油麻地仲未比領展入侵,否則我已經生存唔到。

***

後記:

訪問完結,筆者驚嘆地看著慧惠把一大盤梅菜扣肉飯吃得一點不剩。

當日她順道攜畫作到茶餐廳,員工是第一次看到成品,都看得笑逐顏開。

離開時正由慧惠負責結帳。筆者一直思忖,為何她的打扮好眼熟,朦朧中似有印象。

當她站在櫃台,筆者立即省悟,是《魔女宅急便》!

***

《講港情・小小店》銀の文房具×慧惠畫作展

日期:13/8 - 28/8
時間:12:00 - 19:00
地點:銀の文房具(新蒲崗五芳街27-29號永濟工業大廈 B座1樓1B)

原刊於作者 facebook

發表意見