立場新聞 Stand News

不可放學 只可 Think Big 迫到你斷氣

2015/1/6 — 11:28

老曾有個姪,幾歲仔。有年生日,佢喊。我問佢,你喊乜嘢?佢話因為收到老母份生日禮物。我問,收到禮物都喊?

佢話,我收到本 "New English Today" 。

聽到,老曾都想喊。

廣告

依個咪香港。你睇大婆台幾叻仔,簡直同香港高官有得 fight ,有個節目名叫乜乜乜「猩猩補習班」,都唔知係猩猩幫人類補習,定人類幫猩猩補習。淨係個名爛都算。最慘係佢 sell 嗰種意識型態:

為了要在「起跑線」上領先他人,小朋友自小便要十項全能,琴棋畫畫樣樣皆通。可是,沉重的功課壓力,令活潑的小朋友一聽到「補習」、「英文」和「常識」等等的生字,已經全無學習興趣,父母如何是好?要刺激小朋友學習動機,最好以輕鬆有趣的方式,將與不同範疇有關的英文融入在日常生活情景中,英文自然可以快快「升呢」,要說一口流利英語再不是異想天開!(TVB 網頁

廣告

依一段話個邏輯就係:小朋友一定要贏在起跑線,但係叫佢補習又唔肯喎,點算好?所以要用「歡樂」來坤佢。香港嘅家長,夠晒細心體貼:細路哥,讀書啦,玩乜野呀玩。真係咁想玩?好,比你玩,玩英文練習;細路哥,聽乜野兒歌呀,你真係咁想聽咩?好,唔單止比你聽,仲比你彈添。擺部琴喺度,彈八個鐘,彈到你手抽筋;細路哥,想跑跑跳跳?參加足球班啦。細路哥,鐘意寫寫畫畫,參加繪畫班囉。

贏在起跑線呀嘛,係咁㗎啦。香港細路哥真陰公。

最近陰公又多幾錢重。事因≪放學 ICU≫突然執笠,轉做《Think Big 天地》,「據聞形式與收費兒童台的《猩猩補習班》相近,每集用不同主題去教小朋友學習英語及生活常識」。今次好囉,學山地媽話齋,「自從小學取消半日制,小學雞都是返朝八晚三,幼稚園雞也越來越多讀朝九晚四的全日班。放學後能馬上回家的是幸運兒,不過不代表能看電視,要不去 補個午覺,要不去開始做不見盡頭的功課。」依家無線就係連依班幸運兒都唔俾幸運,要不幸,要扼殺。以後不可「放學」,只可「Think Big」。實行 Big 到你埋牆角。

贏了起跑線,輸了童年。

香港細路哥真係陰公、陰公。

點解咁陰公,之唔係為錢,為廣告。眾所鳩知(盛品儒語),上年無線裁員,譚玉瑛姐姐無得撈,後來整個兒童組據聞炒淨一人。無他,兒童組難吸廣告呀嘛。今時今日,仲有幾多個細路睇你大婆台?上網嘛!睇無線嘅都係師奶多。無他,細路仔想睇玩具廣告,你又估師奶想睇乜:之唔係補習廣告囉、「趣味教材」廣告囉、三個月學好外語廣告囉、名師名校廣告囉。

咁你又估,點先可以吸到依啲廣告?咪《Think Big 天地》囉,咪≪猩猩補習班≫囉。你以為猩猩補集班真係睇猩猩咩,動物園會買廣告咩。

其實《Think Big 天地》嘅真正目標,從來唔係小朋友呀,係補習社同家長呀。仲叫乜兒童節目呀?

香港細路哥真係陰公、陰公、陰公。

發表意見