立場新聞 Stand News

五個紀律部隊成員

2019/6/25 — 10:49

Kenji Wong 攝

Kenji Wong 攝

啟發自Caryl Churchill《七個猶太小孩》(Seven Jewish Children: A Play for Gaza) 。劇本可以由一人或多人演出,不限人數,不限角色。

1

上司話佢地要開會

廣告

上司話個會好重要

上司話我地要好好保護佢地

廣告

上司話我地唔需要知道內容

上司話無人可以阻止條例通過

上司話呢個係關乎香港既和平安定發展

唔洗理出面班人

佢地無權干預香港既發展

上司話出面班人係有申請遊行

但佢地想再一次搞事

搞到好似上次咁大件事

上司話唔可以再比佢地搞事

上司話我地係維持治安

上司話我地無錯

上司話係佢地錯

上司話佢地係暴民

唔係市民

上司話由得佢地集結

上司話叫我地耐心等候

等到黑夜

佢地就知咩事

2

上司話佢地又集結

上司話佢地根本當我地無到

上司話唔可以比人當我地無到

上司話威信好重要

上司話唔服從係好危險

上司話唔可以日日都俾佢地出黎行

上司話佢地比上次少左好多人

佢地係暴民

上司話你有咩不滿

都係佢地搞出黎

上司話幾年前佢地好威風

依家係時候要我地威風

上司話已經買齊裝備

上司話可以使用裝備

上司話打暴民係無問題

係佢地有問題

佢地有武器

唔好問佢地有咩武器

上司話佢地係暴徒

佢地就係危險

但係要忍

上司話要忍到佢地掉野

唔好理佢地掉咩野

上司話只要佢地掉野

就可以做野

上司話除低個號碼牌就可以打

可以打

可以打

可以打

上司話可以放催淚彈

上司話放完唔洗寫報告

可以任放

上司話可以對住人群放

佢地係暴徒

有武器

有防具

死唔去

可以打

上司話可以開槍

唔係真槍

用橡膠子彈

上司話唔會死人

上司話可以打頭

唔會死

上司話咩人都照打

盡情打

上司話可以打記者

記你老母

唔洗理d外國人

上司話唔可以打外國人

上司話只係打年輕人

佢地係暴徒

上司話佢地已經無左人權

上司要佢地訓低

上司話佢地無資格上白車

上司話唔准佢地上白車

上司話由得佢地流血

唔會死

上司話去醫院拉翻d人翻黎

上司話唔會比佢地有好日子過

上司話唔洗理佢地受幾嚴重既傷

唔會死

但有一個人死左

真係麻煩

3

上司話我地又要加班

上司話因為佢地好得閒

上司話要怪就怪佢地無聊無野好做

上司話今次好多人好得閒

仲多過上兩次好多

上司話d人真係好得閒

唔好搞佢地

上司話上司既上司落左命令今次唔可以再搞佢地

上司話要撤走大部分手足

上司話怕越搞越多人好得閒

上司話唔係怕左佢地

上司話因為我地係維持治安

上司話我地最乖

上司話只係消防唔啱

上司話仲有醫護唔啱

上司話連巴士司機都唔啱

上司話當然地鐵司機一定唔啱

上司話係全世界既人唔啱

佢啱

但唔關佢事

上司話今次可以收隊

由得佢地

要忍耐

可以打人

但唔好比人影到

4

上司話上司既上司去左道歉

上司話佢唔明點解上司既上司要跪低

上司話上司既上司都唔明自己點解要跪低

其實佢無跪低

上司話好得閒既人太多

上司既上司既上司好唔滿意

上司話上司既上司既上司唔准再出事

上司話要暫時忍讓

忍呢班人

上司話原來要忍既係佢自己

上司話上司既上司唔負責

上司話要佢負責

上司話點解佢要負責

上司話佢點解要道歉

上司話佢從來都係聽指示

上司話佢無權話事

上司道歉

上司話唔關佢事

上司話係關我地事

係我地自己搞事

係我地件衫無位放號碼

係我地決定開槍

係我地既專業決定要打邊度

係我地決定打邊一個

打邊個記者

上司話係我地既問題

唔係佢既問題

上司話無講過係暴動

佢地唔係暴徒

上司話我地無向所有人開槍

上司話我地只係要捉五個暴民

所以開左好多槍

上司話係d人自己行埋d子彈前面

所以先會中槍

唔係我地射佢地

上司話我地無射過任何一個良好市民

上司話我地無錯

但我地要負責

上司話我地俾份報告佢

要我地解釋要我地負全責

上司個膊頭斜左

5

上司話佢地又好得閒黎搞我地屋企

上司話但係唔可以搞佢地

上司話上司既上司講左唔可以再搞佢地

佢地唔係暴徒

上司話叫文職收工先

上司話叫齊膊頭有花既黎見佢

上司話佢食唔慣d低級飯盒

要我地想辦法

上司話佢地依家唔係暴徒

但一定要想辦法令佢地變成暴徒

上司話要落閘

但要話係被佢地圍困

上司話搵幾個人扮傷者

上司話可以叫白車

但唔好開門俾佢地

上司話要話係班好得閒既人阻礙救援

上司話佢地無人性

上司話一定要搞好耐先可以上白車

上司話唔可以留院

上司話要即刻走唔可以有記錄

上司話係佢地有問題

但係,上司話我地都有問題

要我地負責

上司話無人叫我地俾人影到

上司話提左我地唔好比人影到

上司話今次俾我地累死

上司話市民要嬲既就嬲我地

上司話係我地問候人地老母

係我地情緒失控

係我地開槍打市民

但係佢唔需要負責

上司話呢個就係上司既特權

上司話鬼叫我地低級過佢

上司話鬼叫我地無權選擇邊個話事

上司話要怪就怪自己條命生得唔好

怪就怪個制度係咁唔公平

唔好怪佢

上司話係我地做錯

我地無做錯!點解係我地做錯?我地係維護法紀除暴安良,一心為左個城市,為左個部隊盡心盡力,冒住生命危險去執行任務,執行任務有幾辛苦你係冷氣房會知幾多?膊頭有花既又知幾多?有幾多個膊頭有花?有幾多個有膊頭?係前線既邊個唔想無左個膊頭?點解我地唔可以打佢地,係佢地打我地,佢地用遮吉我地,佢地用磚頭掉我地d伙計,佢地用鐵馬圍住我地,我地好驚,我地生命受到威脅,我地好憤怒,我地要打,我地要還撃,無錯,係還撃,唔係攻擊,一切都係佢地既錯,係佢地咁得閒出黎搞事,係佢地咁得閒唔安安份份接受現實,係佢地咁得閒唔接受佢地無權力,佢地無資格擁有呢個城市,呢d係上司先有既特權,點解上司有特權?點解只有佢無事?我地就有事?又唔係我地話要開槍,話要開槍0個位同事話係收到上司指示,但個上司同事又話係佢上司既指示,咁究竟係邊個上司既指示?而點解無一個上司要負責?而要我地負責?我地點負責?我地膊頭連花都無,點負責?我地連為咩要打人都未搞清楚,點負責?我地只係負責開槍,只係執行0個個,點解我地就要負責?我地只係打份工,份人工唔包負責,又唔見我地有上司咁高人工?點解有咩都係班上司可以無事?咁我地係上司眼中,算係咩?

上司話佢唔會再同我地講野

費事好似係佢發指令要我地做野咁

上司話佢好易甩身

上司話佢已經甩左身

上司話佢完美卸番個波比佢上司同醫院同事

上司話雖然有d大件事

但都算平安渡過

上司話佢準備退休

上司話佢唔會翻黎

上司話理得呢個地方去死

唔再關佢事

由得d暴民搞事

由得我地去頂去衝

由得我地被人埋怨

由得我地被人唱聖詩

上司話佢唔會出事

有咩事都係我地有事

佢從來唔會有事

*記2019年6月香港事件。只要向本人申明用途,即可以免費使用此文字作任何活動。唯不可作任何文字改動,及如因此文字而涉及任何收益,必須將全部收益(不能從中扣除任何行政開支)捐給支援「反送中」的基金,或當中的受害人及家屬,包括受害示威者及警察

發表意見