立場新聞 Stand News

人生哲學的理想

2017/1/13 — 12:41

做人最無可奈何的是,當妳/你未準備好點樣面對自己的人生,應付接踵而至的難題時,妳/你已經要不斷往前衝,迎向命運的各種挑戰,撼到焦頭爛額;但當妳/你大概懂得點樣做人,點樣避重就輕,卻又發覺時日無多,已沒有多少生命力去運用從實戰中學番來的知識了。

咁做人的學問有無得教?同埋又可以係邊度學?我相信部分係得既,當然唔會包生仔,但至少可以令有緣人走少D無得回頭(或害人害己太深)既冤枉路。好簡單講,以趨樂避苦作為人生的指導原則咁至算,對苦與樂有較深刻透徹的分析和理解,自然有助善用生命,規劃(如真的要用此概念的話)自己的人生。呢D做人學問,我認為屬於人生哲學的範疇,未必好高深,好有學術研究價值,但可能對普羅大眾最有裨益。佢既益處,同坊間心靈雞湯或推崇正能量的思考方法不同,唔係要教導/訓練人逆境自強,最終成為產生最大(社會)效益的消費動物和/或人生贏家。當然無法完全排除麻醉神經或抗抑鬱的功用,但人生哲學的進路,重點始終是點樣在種種限制下活出真我,活得深刻,嚮往美而不隨波逐流,盡可能正直善良而又不枉此生。個人追求真善美,如果數量夠多,結集起來,又會形成一股聲音和推動力(消費者運動便是例子),驅使社會朝著更理想的方向發展。

針無兩頭利,有敢於面對、不迴避世界黑暗面的個性,這樣子的人生哲學確實有可能使人的思想變得偏鋒,走進牛角尖,做出世人眼中的傻事。幾年前,在一個談論死亡的公開講座,我便和關子尹教授傾過呢個問題。哲學可以好危險,特別對某些(感應很強的)人來說,接觸過叔本華這類所謂悲觀主義的思想,就像打開一扇門,走進另一世界,再回不了頭。哲學性的自殺並非天方夜譚,但正如宗教或綠色思想,何嘗唔係一樣有可能孕育激進主義,我地也不會一概而論,將之睇成生人勿近的洪水猛獸,我相信哲學再危險,都有限度吧。

廣告

叔本華話「人生就像鐘擺一樣,在痛苦與無聊之間來回搖擺」。我會更進一步講,人連痛苦本身都無聊透頂,只不過,現代社會提供大量娛樂/方法,使人暫時忘記這個殘酷的事實。而人生哲學,就是要敢於正視這個/類問題,有沒有和有甚麼答案還是其次。

 

廣告

#人生 #哲學 #哲學的變革有需要和有可能嗎

原刊於作者 facebook

發表意見